ЗША патрабуюць ад Расеі забяспечыць празрыстасць вучэнняў «Захад 2017»
10- 1.03.2017, 15:07
- 25,764
РФ павінна запрасіць на вучэнні назіральнікаў і незалежныя СМІ.
Генерал ЗША Бэн Ходжэс, які знаходзіцца ў сераду ў Літве, заклікаў Расею забяспечыць празрыстасць вучэнняў «Захад 2017», якія павінны адбыцца ў верасні, піша delfi.lt.
Са слоў камандуючага Наземнымі сіламі ЗША ў Еўропе, гэта дапамагло б знізіць рост занепакоенасці з нагоды вучэнняў.
Ён адзначыў, што Расея павінна запрасіць на вучэнні вялікую колькасць назіральнікаў і прадстаўнікоў СМІ.
Я ведаю, што ёсць непакой з нагоды вучэнняў «Захад 2017», - заявіў Б. Ходжэс журналістам на брыфінгу ў Мінабароны Літвы. - Я заклікаю расейцаў знізіць гэты неспакой з дапамогай празрыстасці. Расейцы павінны запрасіць для ўдзелу СМІ, каб яны ўбачылі гэтыя вучэнні, як NATO запрашае СМІ назіраць за ўсім, што мы робім.
«Таму я заклікаю расейцаў запрасіць не мінімальную колькасць журналістаў і назіральнікаў, прадугледжаную ў Венскім дакуменце, а зрабіць усё ў духу стабільнасці і празрыстасці», - дадаў ён.