Надзвычайнае здарэнне ля будынка брытанскага парламента
- 22.03.2017, 18:27
- 34,550
Побач з будынкам парламента Вялікабрытаніі адбылася страляніна, ёсць пацярпелыя.
Пра гэта паведамляе агенцтва Рэйтар са спасылкай на прэс-службу парламента.
У паведамленні гаворыцца, што пацярпелі як мінімум два чалавекі. У той жа час іншыя крыніцы кажуць пра больш істотную колькасць пацярпелых - ад шасці да 10 чалавек, паведамляе BBC.
Лідар палаты супольнасцяў Дэвід Лідынгтан заявіў парламентарыям, што невядомы параніў паліцэйскага нажом, пасля чаго быў застрэлены паліцыяй. Таксама паведамляецца, што на размешчаным побач з парламентам Вэстмінстэрскім мосце аўто збіла некалькі чалавек.
Са слоў журналіста Кевіна Шофілда, які быў у будынку ў момант страляніны, ён чуў звонкі гук, падобны да ўдару, а затым пачуліся крыкі. Журналіст сцвярджае, што бачыў, як нехта напаў на паліцэйскага, а таксама заўважыў узброенага мужчыну.
Шофілд дадаў, што пасля гэтага раздаліся стрэлы, а на вуліцы з'явіліся ўзброеныя паліцэйскія. Ён таксама сцвярджае, што бачыў, як у двары парламента камусьці надаюць першую дапамогу.
Іншыя відавочцы таксама паведамляюць, што бачылі некалькіх пацярпелых. Аднак паліцыя пакуль афіцыйна не каментуе інцыдэнт. Праца палаты супольнасцяў брытанскага парламента прыпыненая, а доступ у будынак закрыты.