Прадстаўнік ПА АБСЕ: Беларусы маюць права на свабоду слова і мірную дэманстрацыю
6- 24.03.2017, 17:20
- 14,214
Кіраўнік рабочай групы аб Беларусі Парламенцкай асамблеі АБСЕ Кэнт Харстэд пракаментаваў сітуацыю ў Беларусі напярэдадні 25 сакавіка.
Пра гэта паведамляе прэс-служба ПА АБСЕ (пераклад - tut.by).
«Беларускія ўлады павінны праяўляць стрыманасць да дэманстрантаў. Асноўныя правы грамадзян павінны выконвацца, у тым ліку на свабоду слова і мірную дэманстрацыю. Я асабліва занепакоены прэвентыўнымі арыштамі і запалохваннем, якія, як паведамляецца, накіраваныя на тое, каб перашкодзіць пэўным людзям узяць удзел у дэманстрацыях», — заявіў Харстэд.
Пры гэтым ён дадаў, што «ў дэманстрантаў таксама ёсць абавязацельствы».
«Свабода сходаў звязаная з абавязкамі. Арганізатары і ўдзельнікі дэманстрацый павінны сачыць за тым, каб яны адбываліся ў спакойнай і мірнай атмасферы. Я мяркую, што пераважная большасць людзей у Беларусі чакаюць, што паводзіны ўсіх удзельнікаў дэманстрацый будуць спакойнымі і адказнымі», — сказаў кіраўнік рабочай групы.