АБСЕ асудзіла непатрэбнае ўжыванне сілы супраць мірных дэманстрантаў

Кіраўнік БДІПЧ АБСЕ заклапочаны непатрэбным ужываннем сілы беларускімі ўладамі супраць мірных дэманстрантаў.

Кіраўнік Бюро дэмакратычных інстытутаў і правоў чалавека АБСЕ Міхаэль Георг Лінк асудзіў непатрэбнае ўжыванне сілы беларускімі ўладамі супраць мірных дэманстрантаў у Беларусі.

Заяву распаўсюдзіла прэс-служба АБСЕ, паведамляе tut.by.

Лінк перакананы, што беларускія ўлады павінны выконваць абавязальніцтвы, узятыя Беларуссю ў якасці дзяржавы – чальца АБСЕ ў плане павагі да права на свабоду мірных сходаў.

«Паведамленні пра разгон мірных дэманстрацый, адвольныя затрыманні і непатрэбнае ўжыванне сілы супраць пратэстоўцаў, а таксама супраць праваабаронцаў і журналістаў выклікаюць сур'ёзную заклапочанасць», – адзначыў ён.

Лінк таксама падкрэсліў, што падзеі 25 сакавіка і «паведамленні пра затрыманні і арышты сотняў грамадзянаў, актывістаў апазіцыі, журналістаў, ператрусы ў офісах арганізацый грамадзянскай супольнасці і мабілізацыю сілаў бяспекі і АМАПу, былі спробай запалохаць тых, хто планаваў удзельнічаць у мірнай дэманстрацыі».

Нагадаем, 25 сакавіка ў Менску прайшла акцыя з нагоды Дня Волі. Акцыя закончылася сотнямі брутальных затрыманняў па ўсім цэнтры сталіцы.