Беларуска здабыла «золата» на чэмпіянаце Еўропы ў дзюдо ў Польшчы

У фінальнай сустрэчы Марына Слуцкая перамагла спартоўку з Украіны.

Беларуская дзюдаістка Марына Слуцкая здабыла золата чэмпіянату Еўропы ў Варшаве ў вагавой катэгорыі звыш 78 кг. У фінальнай сустрэчы яна перамагла Святлану Яромку з Украіны, паведамляе БелТА.

Марыне Слуцкай спатрэбілася крыху больш за дзве хвіліны ў вызначальнай сустрэчы, каб зарабіць ацэнку "іпон" - чыстая перамога. Бронзавыя ўзнагароды ў гэтай вазе дасталіся немцы Каралін Вайс і Ларысе Чэрыч з Босніі і Герцагавіны. Для беларускі ў гэтым сэзоне гэта не першы вялікі поспех. На пачатку красавіка Марына Слуцкая таксама стала пераможцай прэстыжнага турніру Гран-пры Тбілісі.