У Беластоку прайшоў Катынскі «марш ценяў»
4- 24.04.2017, 11:29
- 8,251
Нашчадкі польскіх афіцэраў ушанавалі іх памяць.
Вуліцамі Беластока прайшоў 3-й Катынскі марш ценяў. Такім чынам нашчадкі забітых у Катыні палякаў ушанавалі іх памяць, паведамляе «Радыё Польшча».
«Думаю, што ў пэўнай ступені я павінна гэта рабіць для яго. Мы стараемся берагчы і захоўваць памяць пра гэта», - сказала Агнешка Маркевіч-Цыбульская з таварыства «Катынскія сем'і» ў Беластоку, чый дзед загінуў у Катыні.
Са слоў Марціна Аркевіча з гістарычнага бюро інстытута нацыянальнай памяці, амаль паўтысячы ахвяр Катынскага злачынства з'яўляюцца выхадцамі Беластока.
«Гэта перш за ўсё малодшыя афіцэры рэзерву, якія прадстаўлялі шмат прафесій: лекары, чыноўнікі, людзі культуры. Гэта значыць, як і ў выпадку ўсіх ахвяраў Катынскага злачынства, гэта даваенная польская эліта», - дадаў ён.
Марш завяршыўся на Катынскай плошчы. Арганізатарамі мерапрыемства выступілі таварыства «Катынская сям'я», «Група Усход» і Беластоцкае аддзялення Інстытута нацыянальнай памяці.
У шэсці ўзялі ўдзел некалькі дзясяткаў чалавек.