«УКантакце» ўвялі платную падпіску на музыку
17- 28.04.2017, 11:42
- 10,736
Сацыяльныя сецівы «УКантакце», «Аднакласнікі» і «Мой свет» уводзяць платную падпіску на музыку.
Пра гэта паведамілі «Ведомости».
Падпіска будзе працаваць як у настольных версіях сацыяльнага сеціва, так і ў мабільных дадатках. У дэкстопных версіях яна дасць магчымасць слухаць кампазіцыі без рэкламы, а ў мабільных — таксама захоўваць музычныя трэкі і слухаць іх без доступу да сеціва.
Падпіска будзе афармляцца праз платформу Boom. Для расейскіх карыстальнікаў яна будзе каштаваць 149 расейскіх рублёў у месяц (аналаг 4,91 беларускага рубля паводле цяперашняга курсу). Адна падпіска дазволіць слухаць музыку на ўсіх платформах.
Таксама «УКантакце» абнавіла раздзел «Аўдыёзапісы» ў дэсктопнай версіі. У ім з'явілася магчымасць дзяліцца плэйлістамі і памяняўся знешні выгляд плэера.
З абнаўленнем раздзела аўдыёзапісаў «УКантакце» таксама выдаліла з Android-дадатку функцыю кэшавання музыкі, якая дазваляла карыстальнікам слухаць захаваныя ў памяці трэкі без інтэрнэту, паведамляе vc.ru. З iOS-дадатку сацыяльнага сеціва кэшаванне музыкі знікла ў верасні 2016 года, калі «УКантакце» ўдалося вярнуць музычны раздзел.