Марына Адамовіч: Кожны з нас можа стаць лідарам пратэстаў
2- 1.05.2017, 15:12
- 11,394
Заўсёды можа знайсціся годны чалавек, які закліча: «Падымаем сцяг назад!»
Пра гэта Марына Адамовіч, жонка аднаго з лідараў Беларускага Нацыянальнага Кангрэсу Мікалая Статкевіча заявіла журналістам «Белсату» падчас першамайскай акцыі на Кастрычніцкай плошчы ў Менску.
- Чаму вы прыйшлі на Кастрычніцкую плошчу?
- Дзіўна было б, калі б я зрабіла інакш. Свае правы трэба бараніць - тым больш у дзень, які ва ўсім свеце адзначаецца як Дзень міжнароднай салідарнасці.
- Як вы пракаментуеце затрыманне Мікалая Статкевіча?
- Улады хочуць зноў прымусіць нас думаць, што народ - быдла, і з намі можна рабіць усё, што заўгодна. Але я думаю, што вяртання назад ужо не будзе, народ ужо прачнуўся.
- У сацыяльных сетках выказвалася меркаванне, што Марына Адамовіч можа ўзначаліць акцыю 1 траўня...
- Я тут прадстаўляю толькі сябе. Але я ўпэўненая, што знойдзецца шмат годных людзей, каб узначальваць акцыі пратэсту ў Беларусі. Кожны з нас можа стаць лідарам, калі гэта неабходна. Як гэта было 25 сакавіка, калі просты чалавек заклікаў: «Падымаем сцяг назад!».