РФ хоча стварыць у Беларусі цэнтры рамонту сваёй вайсковай тэхнікі

Расея ўважае перспектыўным стварэнне ў Беларусі тэхнічных сэрвісных цэнтраў (СТЦ) у абслугоўванні ўзбраення, вайсковай і спецыяльнай тэхнікі.

Пра гэта заявіў сёння журналістам дырэктар Федэральнай службы ў вайскова-тэхнічным супрацоўніцтве Расеі Дзмітрый Шугаеў, паведамляе БелТА.

«Праца ў вайскова-тэхнічным супрацоўніцтве з беларускімі калегамі будуецца паводле пэўнага прынцыпу. На сёння асноўнае - гэта пастаўкі. Тым не менш, пытанне рамонту, мадэрнізацыі, паставак запчастак не сыходзіць з парадку дня. Больш таго, у нас ёсць пэўная праграма, ёсць пілотныя праекты стварэння СТЦ, якія тычацца тэхнікі СПА, радыёэлектроннага абсталявання, бранятанкавай тэхнікі», - сказаў Дзмітрый Шугаеў.

На ягоную думку, такія СТЦ патрэбныя як беларускаму боку, так і расейскім партнёрам, якія разумеюць, што калі тэхніка выкарыстоўваецца ва ўзброеных сілах, яна павінна праходзіць абслугоўванне і рамонт на месцы. «Таму ўпэўнены, што ў гэтых праектаў ёсць будучыня. А мы са свайго боку будзем прыкладаць усе намаганні, каб яны былі рэалізаваны», - запэўніў дырэктар Федэральнай службы ў вайскова-тэхнічным супрацоўніцтве Расеі.