Жыхары Баранавічаў: Калі давядзецца, мы на мітынг выйдзем

Жыхары шматпавярховікаў пратэстуюць супраць будаўніцтва ў іх двары на месцы дзіцячай пляцоўкі хмарачоса.

Больш за месяц таму скончылася грамадскае абмеркаванне плана забудовы Вайсковага гарадка, аднак жарсці ў мікрараёне кіпяць дагэтуль. Жыхары некалькіх шматпавярховікаў пратэстуюць супраць будаўніцтва ў іх двары на месцы дзіцячай пляцоўкі хмарачоса, піша intex-press.by.

Больш за 400 з 607 галасоў, якія паступілі ў Баранавіцкі гарвыканкам падчас грамадскага абмеркавання, належаць ім.

- Гэтая дзіцячая пляцоўка збірае дзяцей не толькі з нашага двара, гуляць сюды прыходзяць амаль з усяго мікрараёна, - кажа Андрэй Віктараў, які вырас у гэтым двары. - Мае дзеці часта прыязджаюць сюды гасцяваць да бабулі з дзядулем. І дзіцячая пляцоўка - іх улюбёнае месца для гульняў.

Андрэй Віктараў распавёў, што жыхары двара бралі ўдзел у грамадскім абмеркаванні, і ім адказалі, што дэталёвы план забудовы Вайсковага гарадка прадугледжвае размяшчэнне ў раёне дзіцячых пляцовак «у дастатковай колькасці». Аднак гараджан такая альтэрнатыва цяпер існага ўпарадкавання іх двара не задавальняе. Згодна з новым планам, спраектаваная дзіцячая пляцоўка будзе значна меншая. Акрамя таго, пабудаваць яе плануюць на месцы, дзе, як сцвярджаюць жыхары, «увесь час скразнякі».

- Там і дарослы чалавек больш за дзесяць хвілін без наступстваў для здароўя не прабавіць, не кажучы ўжо пра дзяцей, - разважае Ганна Кукушкіна, жыхарка дома на вуліцы Арджанікідзэ, 16.

Пагроза страціць ўпадабаную шмат якімі дзецьмі пляцоўку - не адзінае, што хвалюе жыхароў двара. Яны турбуюцца таксама, што са з'яўленнем новага дома ў двары моцна павялічыцца колькасць прыпаркаваных аўтамабіляў.

- Для нас і цяпер гэта праблема, - кажа Ганна Кукушкіна. - Увечары аўто з'язджаецца столькі, што часам хуткая дапамога пад'ехаць да пад'езда не можа. А што будзе, калі тут з'явіцца яшчэ адзін высокі дом?

Не менш людзі абураныя таксама тым, што ўсе іх спробы паўплываць на лёс уласнага двара дарэмныя.

- Мала таго, што аб грамадскім абмеркаванні даведаліся зусім выпадкова: ніякіх аб'яў у нас на пад'ездах не было. Дык яшчэ і наш актыўны ўдзел у абмеркаванні ніякага выніку не даў. Чыноўнікі апублікавалі сваю пастанову, не выходзячы з кабінета, вось і ўсё супрацоўніцтва, - абураецца Святлана Сідарэнка, яшчэ адна жыхарка двара.

Аднак сустрэча абураных жыхароў Вайсковага гарадка з прадстаўнікамі ўлады адбудзецца. Пра гэта паведаміў намеснік начальніка ўправы архітэктуры і горадабудаўніцтва Баранавіцкага гарвыканкама Алег Яўсееў.

- Хваляванні людзей зразумелыя. Аднак дэталёвы план распрацоўваўся для таго, каб не проста не ствараць новых праблем у Вайсковым мястэчку, але і развязаць існыя, - адзначыў Алег Яўсееў. - І тое, што ў плане у гэтым двары стаіць дом, яшчэ не значыць, што яго там пабудуюць. Цяпер людзей хвалюе недахоп парковачных месцаў, іх колькасць павялічаць. Дзіцячыя пляцоўкі таксама пабудуюць у патрэбнай для жыхароў мікрараёна колькасці. Ніводная праектная арганізацыя не зможа перамагчы ў тэндэры, пакуль не падасць нам праект, які задаволіць жыхароў мікрараёна.

Сустрэча жыхароў Вайсковага гарадка з прадстаўнікамі ўлады прызначаная на 25 траўня. Людзі рашуча настроены бараніць свае правы і дамагацца змен у дэталёвым плане.

- Мы вельмі спадзяемся, што нас пачуюць, - кажа Ганна Кукушкіна. - Калі не, мы сваю барацьбу не спынім. Мала хто верыць, што ў нас штосьці атрымаецца, але мы адступаць не станем. Калі трэба будзе, пададзім заяўку на мітынг. Але пляцоўку для сваіх дзяцей мы абаронім!

У Беларусі не занадта шмат прыкладаў таго, калі людзям удавалася абараніць сваю пазіцыю ў барацьбе з дзяржаўнай машынай. Адзін з іх - прыпыненне будаўніцтва бізнэс-цэнтра недалёка ад месца пахавання ахвяр сталінскіх рэпрэсій ва ўрочышчы Курапаты пад Менскам.

Зміцер Дашкевіч, адзін з актыўных удзельнікаў акцыі супраць будаўніцтва, лідар арганізацыі «Малады фронт», упэўнены, што змагацца і рашуча бараніць свае правы трэба ўсім разам.

- Супольная барацьба аб'ядноўвае людзей, з'яўляецца мэта, якой лягчэй дасягнуць усім разам. Юрыдычна ўся гэтая сістэма пабудаваная так, што размовы з чыноўнікамі ў кабінетах наўрад ці дадуць патрэбны вынік, - адзначыў Зміцер Дашкевіч. - Праблема ў тым, што кожны чыноўнік кожнага ўзроўню ў нашай краіне адказны не перад людзьмі, а перад яшчэ больш высокім чыноўнікам, перад тым рэжымам, які яго на гэтае месца паставіў. На жаль, цяпер, пакуль людзі не стануць грудзьмі на тэхніку, жаданага выніку дамагчыся практычна немагчыма.