Начальнік ДАІ распавёў пра новыя неспадзеўкі для кіроўцаў і пешаходаў

У Беларусі анансавалі новую рэдакцыю правіл дарожнага руху.

Ужо ў найбліжэйшыя два месяцы пра парушэнне ПДР беларусам будуць паведамляць праз СМС, да канца года ДАІ прапануе змены ў правілах дарожнага руху, а ў двух-трохгадовай перспектыве практычна ўсе паслугі кіроўцы змогуць атрымаць анлайн. Такія планы сёння ў эфіры праграмы «Контуры» на тэлеканале АНТ агучыў начальнік Упраўлення дзяржаўтаінспекцыі МУС Беларусі Дзмітрый Карзюк, паведамляе tut.by.

Спыняцца перад пешаходам давядзецца радзей

Дзмітрый Карзюк анансаваў, што да канца года з'явіцца праект змен правіл дарожнага руху. Усіх падрабязнасцяў ён не раскрыў, але адзначыў, што там сапраўды па-іншаму прапішуць прыярытэты кіроўцаў і пешаходаў на «зебрах».

- Мы створым больш канкрэтныя правілы, у якім месцы і ў які час кіроўца павінен спыніцца, каб прапусціць пешахода. Будзе дакладна пазначана, у якой паласе павінен знаходзіцца пешаход для абавязковага спынення аўтамабіля кіроўцам, - сказаў без канкрэтыкі начальнік ДАІ Беларусі.

З ягоных слоў, новая рэдакцыя правіл павысіць бяспеку на дарогах.

Паведамленні пра штрафы будуць прыходзіць на мабільны

У найбліжэйшыя два месяцы так званыя лісты шчасця парушальнікаў правілаў дарожнага руху будуць прыходзіць не па пошце, а ў выглядзе СМС на мабільны. Сістэма цяпер праходзіць тэставанне.

З дапамогай камер і відэа-радараў ДАІ сёння сочыць за перавышэннем хуткасці, няправільнай паркоўкай, праездам на чырвоны сігнал святлафора і рухам па палосах для грамадскага транспарту.

Чэргі ў ДАІ знікнуць, але гады праз два-тры

1 чэрвеня ДАІ абвесціць тэндэр на распрацоўку аўтаматызаванай сістэмы па продажы сваіх паслуг. У поўную сілу яна запрацуе гады праз два-тры.

- З дапамогай гэтай сістэмы мы плануем максімальна знізіць кантакт паміж заяўнікам і супрацоўнікам ДАІ. Зарэгістраваць машыну, выбраць нумар і аплаціць усе паслугі можна будзе праз інтэрнэт, - паабяцаў Дзмітрый Карзюк. - Застануцца дзве адміністрацыйныя працэдуры, на якія трэба будзе прыходзіць асабіста: гэта зверка і атрыманне дакументаў.

Таксама ў планах убудоўваць у пасведчанні кіроўцаў РФ-пазнакі. Гэта значыць, што, калі вас спыніць супрацоўнік ДАІ, падаваць пасведчанне кіроўцы яму будзе неабавязкова. Сістэма падлічвае звесткі на адлегласці і самастойна перадасць усю інфармацыю пра кіроўцу на планшэт інспектара.