За кратамі застаюцца 7 палітвязняў у «справе патрыётаў»

Гэта Аляксей Абрамаў, Андрэй Дундукоў, Іван Кавальчук, Андрэй Комлік-Ямацін, Міраслаў Лазоўскі, Віктар Мароз і Дзмітрый Новік.

Усе гэтыя актывісты былі затрыманыя ў сакавіку. Спачатку іх абвінавачвалі ў «падрыхтоўцы масавых беспарадкаў», пазней - у «стварэнні незаконнага ўзброенага фармавання».

На днях на волю выйшлі таксама 7 чалавек - Сяргей Стрыбульскі, Аляксандр Зімніцкі, Уладзімір Фёдараў, Уладзімір Румянцаў, Цімур Пашкевіч, Алесь Яўдаха і Віктар Данілаў.

Абвінавачванне ў «падрыхтоўцы масавых беспарадкаў» з іх знялі. Вызваленыя знаходзяцца пад падпіскай аб нявыездзе.

Праваабаронца Валянцін Стэфановіч у каментары «Радыё Свабода» выказаў надзею, што вызваленне групы фігурантаў «справы патрыётаў» азначае, што доваднай базы ў гэтай справе няма:

«Інфармацыі аб справе было няшмат, цяпер людзі выходзяць і высвятляецца ўсё больш і больш нюансаў. А распавядаюць яны вельмі цікавыя рэчы. Вось маладафронтаўцы распавядалі аб парушэннях правоў, у тым ліку і на абарону, на непрацэсуальныя дзеянні без адвакатаў. Ну а тое, што ўчора казалі вызваленыя, - іх дапытвалі за 3 месяцы ўсяго пару разоў. Гэта азначае, што доваднай базы там фактычна не было.

Калі довадная база слабая, то лепш да суду гэтую справу не даводзіць, спыніць яе і вызваліць людзей. Таму што судзіць публічна людзей без довадаў - гэта будзе ўжо відавочна для ўсіх, што справа шытая белымі ніткамі.

Пакуль што ў тых, хто вызваляецца, працэсуальны статус не змяніўся зусім, яны застаюцца падазраванымі. Але тое, што ім змянілі меру стрымання са знаходжання пад вартай пад падпіску аб нявыездзе, мне здаецца, можа быць першым крокам да таго, каб вядзенне гэтай справы было цалкам спыненае.

Прынамсі, тое ж самае мы назіралі ў першай справе, якая была распачатая яшчэ 22-23 сакавіка, калі былі першыя затрыманні «ў падрыхтоўцы да масавых беспарадкаў». Спачатку яны вызвалялі людзей, змяняючы ім меру стрымання, вызвалілі такім чынам фактычна ўсіх, хто абвінавачваўся толькі паводле гэтага артыкула, каму не была дадаткова інкрымінаваная «арганізацыя незаконнага ўзброенага фармавання». Пасля таго, як усіх вызвалілі, справа была перададзеная Камітэтам дзяржаўнай бяспекі следчага камітэту. І следства аб арганізацыі масавых беспарадкаў было спыненае цалкам. Я мяркую, што такое ж развіццё падзей мы ўбачым і ў гэтай справе. Хоць, калі аналізаваць усё цалкам, калі сапраўды так здарыцца, што справа будзе поўнасцю закрытая, тут узнікае вялікая колькасць пытанняў да таго, што мы ўбачылі вясной: да фрау А., да аператыўных здымкаў з бутэлькамі з запальнай вадкасцю і яшчэ шмат да чаго».