Дзе «засвяціўся» адлучаны ад пасады міністр Каўхута

Чым займаўся апальны міністр прыродных рэсурсаў Беларусі.

У дачыненні да кіраўніка Мінпрыроды Андрэя Каўхуты распачатая праверка, а сам чыноўнік адхілены ад працы.

Яшчэ ў сярэдзіне сакавіка з'явілася інфармацыя пра тое, што КДБ і КДК западозрылі чыноўнікаў міністэрства, а таксама работнікаў «Навукова-вытворчага цэнтра геалогіі» ў зрыве дзяржпраграмы, піша «Салiдарнасць».

Тады паведамлялася, што гаворка ідзе пра шкоду дзяржаве на суму 600 тысяч даляраў, якія дзяржустанова нібыта пераплаціла свідравым кампаніям за не да канца выкананыя выведачныя работы.

Падазраванымі былі прызнаныя чатыры кіраўнікі НПЦ і яго філіялаў, а таксама высокапастаўлены чыноўнік з Мінпрыроды.

Цікава, што прозвішча Каўхуты ў той момант не называлася. Але ўжо 8 чэрвеня стала вядома, што міністр прыродных рэсурсаў і аховы навакольнага асяроддзя Андрэй Каўхута адхілены ад працы, бо ў дачыненні да яго была распачатая праверка.

Галоўным следчым управы расследуецца крымінальная справа аб службовым падлогу ў дачыненні да шэрагу службовых асобаў, у якасці падазраванага паводле гэтай справы прыцягнуты Міністр прыродных рэсурсаў і аховы навакольнага асяроддзя Андрэй Каўхута, распавяла афіцыйная прадстаўніца Следчага камітэта Юлія Ганчарова. Дзеянні службовай асобы кваліфікаваныя паводле ч.4 арт.16, ч.1 арт.427 (Арганізацыя службовага падлогу) Крымінальнага кодэкса РБ. З падазраваным праводзяцца следчыя дзеянні, мера стрымання не ўжывалася. На пастанову следства абраная мера працэсуальнага прымусу - адхіленне ад пасады.

Што вядома пра міністра, якім зацікавіліся сілавікі?

Узначальваў «НПЦ геалогіі»

Цягам свайго кар'ернага шляху Каўхута паводзіў сябе даволі ціха і, мабыць, быў адным з самых непрыкметных міністраў ва ўрадзе.

Аб чыноўніку вядома няшмат: напрыклад, у 2013-2014 гадах, яшчэ да свайго ўступлення на пасаду міністра, ён працаваў першым намеснікам гендырэктара «Навукова-вытворчага цэнтра геалогіі».

Магчыма, гэты факт і выклікаў падазрэнне правяраючых, калі іх задачай было знайсці сувязь паміж чыноўнікамі міністэрства і работнікамі цэнтра.

Дзяліўся зубрамі з Расеяй

Яшчэ адзін факт, праз які імя чыноўніка згадвалася ў СМІ, звязаны з перадачай беларускіх зуброў у Расею. Напрыклад, у пачатку чэрвеня Андрэй Каўхута заявіў, што Беларусь гатовая падзяліцца зубрамі з расейскімі запаведнікамі - і прызнаў факт перамоваў аб тым, каб пяць жывёлін папоўнілі біялагічную разнастайнасць нацыянальнага парку «Смаленскае Паазер'е».

Навіна выклікала неадназначную рэакцыю ў сацыяльных сетках і на дыскусійных пляцоўках.

Адпраўляў сына ў дэпутаты

У разгар парламенцкай кампаніі 2016 года «Салiдарнасць» звярнула ўвагу на тое, што ў адной з акругаў Менскай вобласці ў дэпутаты балатуецца чалавек з вядомым прозвішчам - намеснік гендырэктара агракамбіната «Ждановічы» Віктар Каўхута.

Як высветлілася, сын міністра сапраўды вызначыў пачаць палітычную кар'еру - і вылучыўся ў дэпутаты. Ён стаў канкурэнтам адыёзнага кандыдата - «казацкага атамана» Мікалая Улаховіча.

На выбарах Каўхута-малодшы перамагчы не здолеў.