У маладых і шматдзетных сем'яў забралі дзярждапамогу

Новы ўказ Лукашэнкі можа пакінуць без жылля тысячы сем'яў.

Новы ўказ Лукашэнкі № 240 пра адрасныя жыллёвыя субсідыі быў падпісаны на мінулым тыдні. У сілу ён уступіць 6 жніўня, паведамляе tut.by.

А праз месяц пасля гэтага, як апынулася, страціць сілу іншы ўказ – пра дапамогу маладым і шматдзетным сем'ям пры будаўніцтве жылля – № 585.

Хто, на што і ў якім памеры атрымае субсідыю на будаўніцтва жылля

Паводле ўказа № 585 маладыя і шматдзетныя сем'і, якія стаяць у чарзе на паляпшэнне жыллёвых умоваў, маглі разлічваць на датацыі ад дзяржавы пры будаўніцтве жылля ў крэдыт, які бралі ў камерцыйным банку. Сума фінансавай падтрымкі была розная. Напрыклад, маладым сем'ям пры нараджэнні першага дзіцяці або наяўнасці аднаго няпоўнагадовага дзіцяці датавалі мінімум 20, а пазней усе 40 бюджэтаў пражытковага мінімуму. Сёння гэта 7,3 тысячы рублёў. Шматдзетным сем'ям з трыма і больш дзецьмі выдавалі 50 бюджэтаў – гэта значыць крыху больш за 9 тысячаў рублёў. Паводле 585-га ўказа на субсідыю можна было разлічваць толькі пасля таго, як дом здалі ў эксплуатацыю. Атрымліваецца, што тыя, чые дамы не паспеюць здаць да верасня, субсідыю не атрымаюць.

– У надзеі на дапамогу дзяржавы мы ў снежні 2016 года ўзялі крэдыт на жыллё пад драконаўскую стаўку – 21%. Меркавалі, што паводле 585-га ўказа зможам, як маладая сям'я, атрымаць дзяржпадтрымку памерам 40 бюджэтаў пражытковага мінімуму, – распавядае Віктар. – Але атрымаць дзяржпадтрымку не зможам – раптоўна ўказ 585 проста перастане дзейнічаць. Калі пайшлі чуткі пра новы ўказ Лукашэнкі, я звяртаўся ў Міністэрства архітэктуры, але там казалі, хутчэй за ўсё, ён будзе працаваць паралельна з указам № 585. А апынулася, яго ўсё-ткі скасоўваюць. А нам давядзецца выплачваць крэдыт паводле поўнай стаўкі.

Некаторыя сем'і пастанавілі будавацца толькі пасля таго, як атрымалі пацверджанне з Мінбудархітэктуры, што 585 указ будзе дзейнічаць разам з новым.

– Перш чым уступіць у будаўніцтва, мы са знаёмымі маладымі сем'ямі звярнуліся ў Мінбудархітэктуры, і там нам сказалі, што 585 указ будзе дзейнічаць нароўні з новым указам. Таму спакойна ўступілі ў будаўніцтва ў траўні, дом наш павінны здаць у канцы верасня, – распавядае маладая мама Сняжана. – Банк, у якім мы планавалі браць крэдыт пад 12%, выдаваў яго толькі з умовай, што за кватэру ўнесена ўжо больш за 50% сваіх сродкаў. Нядаўна мы з мужам аплацілі больш за 60% і крэдыт збіраліся браць толькі ў жніўні. Грошы мы доўга збіралі, пазычалі і моцна разлічвалі на 585 указ, каб вярнуць пазыкі. А цяпер атрымліваецца, што ўсіх нас кінулі. Калі на ўсіх каналах чыноўнікі распавядалі пра новы 240-ы ўказ, яны ні слова не сказалі пра тое, што стары дзейнічаць перастане. І многія маладыя сем'і спакойна бралі крэдыты, каб палепшыць свае жыллёвыя ўмовы.

У Міністэрстве архітэктуры і будаўніцтва тлумачаць: указ № 585 сапраўды страціць сілу праз месяц пасля ўступлення ў сілу ўказа № 240.

– Калі нехта не паспее атрымаць фінансавую дапамогу паводле ўказа 585 да таго, як ён страціць сілу, не атрымае яе. Гэта жыццё, – пракаментаваў сітуацыю кіраўнік управы жыллёвай палітыкі Міністэрства архітэктуры і будаўніцтва Аляксандр Горваль. – З указам № 240 указ № 585 ніяк не перасякаецца. Паводле ўказа 240 атрымаць субсідыю грамадзяне змогуць толькі ў парадку чаргі.