Міністр абароны Польшчы ўстурбаваўся вучэннямі «Захад-2017»
5- 15.08.2017, 18:40
- 18,033
Пра гэта Антоні Мацярэвіч заявіў падчас сустрэчы з міністрам абароны Украіны.
Міністр абароны Украіны Сцяпан Палтарака правёў перамовы са сваім польскім калегам Антоніем Мацярээвічам у рамках рабочага візіту ў Варшаву, польскі міністр выказаў устурбаванасць у сувязі з вучэннямі Расеі і Беларусі.
Пра гэта паведамляе Урадавы партал Украіны.
Падчас перамоў Палтарака акцэнтаваў увагу на існай пагрозе з боку Расеі, а таксама праінфармаваў аб сітуацыі ў зоне правядзення антытэрарыстычнай аперацыі (АТА) на Данбасе.
Мацярэвіч, у сваю чаргу, адзначыў адсутнасць прагрэсу ў выкананні менскіх дамоўленасцяў з віны Расеі.
Ён таксама выказаў устурбаванасць у сувязі з запланаванымі на верасень супольнымі вучэннямі Расеі і Беларусі «Захад - 2017», якія пройдуць паблізу ўкраінскіх межаў.
Палтарака і Мацярэвіч абмеркавалі ўзмацненне вайскова-тэхнічнага супрацоўніцтва паміж УСУ і Польшчай, а таксама вучэнні літоўска-польска-ўкраінскай брыгады.
«Я высока ацэньваю вынікі гэтай сустрэчы, якая чарговым разам даводзіць, што Польшча была, ёсць і будзе стратэгічным партнёрам для Украіны», - падкрэсліў Палтарака.
Нагадаем, расейска-беларускія вучэнні «Захад-2017» пройдуць з 14 да 20 верасня. Яны стануць заканчальным этапам супольнай падрыхтоўкі ўзброеных сіл Беларусі і Расеі ў гэтым навучальным годзе.
Міністр абароны Украіны Сцяпан Палтарака падчас сустрэчы з генеральным сакратаром NATO Енсам Столтэнбэргам уШтаб-кватэры NATO назваў пагрозай правядзенне беларуска-расейскіх вучэнняў «Захад-2017» на мяжы з Украінай.