«Нямецкая хваля»: Беларускія ўлады заклапочаныя грашыма грамадзян за мяжой

Што стаіць за новымі папраўкамі Мінфінансаў у Падатковы кодэкс?

Мінфінансаў Беларусі апублікавала праект змяненняў у Падатковы кодэкс. Паводле адной з паправак плануецца ўвесці штраф (да 30 еўраў у эквіваленце) за непаведамленне грамадзянамі аб адкрыцці імі рахункаў за мяжой. Цяпер фізічныя і юрыдычныя асобы павінны атрымліваць на адкрыццё рахункаў у замежных банках дазвол «Нацбанку», але адказнасць за парушэнне гэтай нормы ёсць толькі для юрыдычных асоб. У чым прычына ініцыятывы Мінфінансаў і ці ёсць у ёй палітычная падаплёка, высвятляла выданне «Нямецкая хваля».

Заслон для фінансавання з-за мяжы

З 2001 года ў Беларусі дзейнічала норма аб тым, што ўсякія сродкі з замежжа грамадзяне краіны павінны былі рэгістраваць у дэпартаменце гуманітарнай дзейнасці Кіраўніцтва справамі прэзідэнта. Так улады, паводле ацэнак шэрагу аналітыкаў, спрабавалі перакрыць каналы для фінансавання магчымай «каляровай рэвалюцыі». Пазней гэтую норму скасавалі. Але для НКА гэтае патрабаванне захоўваецца, акрамя гэтага, замежныя гранты можна выкарыстоўваць толькі пасля атрымання дазволу дэпартамента.

Пры гэтым у Крымінальным кодэксе ёсць артыкул 369.2 «Атрыманне замежнай бязвыплатнай дапамогі ў парушэнне заканадаўства Рэспублікі Беларусь», у якой выкарыстанне замежных фінансаў для палітычнай і агітацыйна-масавай работы сярод насельніцтва караецца аж да двух гадоў пазбаўлення волі.

Ці ёсць палітычны аспект у папраўках Мінфінансаў?

Папраўкі ў Падатковы кодэкс некаторыя карыстальнікі сацсетак успрынялі ў палітычным кантэксце з улікам нядаўніх ператрусаў у офісах незалежных прафзвязаў і выстаўленні іх лідарам Генадзю Фядынічу і Ігару Комліку абвінавачванняў у нясплаце падаткаў з сум, якія нібыта паступілі на іх замежныя рахункі.

Шмат хто ў гэтай сувязі ўспомнілі гучны працэс паводле справы Алеся Бяляцкага, лідара незарэгістраванага праваабарончага цэнтра «Вясна». Тады суд палічыў, што сродкі, прызначаныя, са слоў Бяляцкага, для дапамогі рэпрэсаваным у Беларусі, якія паступілі на ягоны асабісты рахунак за мяжой, з'яўляюцца прыбыткам праваабаронцы. У 2011 годзе ён быў прызнаны вінаватым ва ўхіленні ад выплаты падаткаў і асуджаны на 4,5 гады пазбаўлення волі з канфіскацыяй маёмасці.

Забаронныя захады не дадуць эфекту

Кіраўнік Беларускага Хельсінскага камітэта (БХК) Алег Гулак у інтэрв'ю DW не выключыў, што ўлады ў гэтым выпадку змагаюцца «і з палітычнымі грашыма, але не факт, што гэта з'яўляецца галоўным. Распрацоўшчык паправак у Падатковы кодэкс - Мінфінансаў, а ў яго ўсё ж логіка не кадэбэшная». Гулак таксама мяркуе, што навацыя можа быць чыноўніцкай ініцыятывай, мэта якой - толькі дэманстрацыя начальству барацьбы з неаплатнікамі падаткаў. Кіраўнік БХК перакананы, што прапанаваныя забаронныя захады відавочна не дадуць эфекту.