Андрэй Стрыжак: Да нас чарговым разам залезуць кішэню

Увядзенне школьнай формы - гэта лабіяванне інтарэсаў «Беллегпрама».

Пра гэта бацька другакласніка, актывіст незалежнага прафзвязу РЭП Андрэй Стрыжак заявіў у інтэрв'ю сайту Charter97.org, каментуючы апошнія школьныя «рэформы».

- Сёння ў Менску пачаў працу «рэспубліканскі педагагічны савет». Ёсць надзея, што бацькі нарэшце атрымаюць адказ на пытанне - калі адводзіць дзяцей у школу. Як асабіста вы ставіцеся да ўвядзення «графіка пад Колю»?

- Я мяркую, што няма нічога добрага для тых, хто прывык хадзіць у школу да 8-й раніцы, у замене на 9. А ўлічваючы тое, што ва ўладаў ёсць схільнасць змяняць усё потым назад, мяркуючы паводле адукацыі: то яны ўводзяць 12 класаў , то 11, то 10-бальную, то 5-бальную сістэму - гэта ўсё стварае вельмі нервовую абстаноўку ў школе і адцягвае ад самага галоўнага, чым, уласна кажучы, школа і павінна займацца - адукацыйнага працэсу.

Увогуле, я адмоўна стаўлюся да ідэі пераносу пачатку вучэбных заняткаў на 9 раніцы, таму што больш чым упэўнены, што потым яны ізноў нешта прыдумаюць.

- А што вы скажаце пра тое, што ў школах абавязалі бацькоў закупіць да новага навучальнага года абавязковую школьную форму?

- Мне здаецца, што ўвядзенне школьнай формы - гэта лабіяванне інтарэсаў «Беллегпрама», бо напэўна бацькам будзе прапанаваная форма беларускага вытворцы. Улічваючы тое, якая якасць і кошт у вырабаў «Беллегпрама», можна сказаць, што да нас чарговым разам залезуць ў кішэню, для таго каб аплаціць неканкурэнтаздольную прадукцыю, якая наогул не павінна выпускацца. Упэўнены, што дзіця ў такім адзенні будзе адчуваць сябе горш, чым калі б яно было адзетае ў больш добры, якасны гарнітур ад імпартнага вытворцы.

Зноў жа ўстае вялікае пытанне аб складзе гарнітура, таму я мяркую, што гэта нядобрае новаўвядзенне, якое з'яўляецца спробай развязання эканамічных праблем за кошт нас у канчатковым выніку.

Таксама я мяркую і пра ўвядзенне формы для настаўнікаў. Ёсць пэўнае паняцце дзелавога стылю. Практычна ва ўсіх школах дырэктары ва ўнутраных дакументах прапісваюць, што настаўнік павінен быць на працы ў адзенні дзелавога стылю. Я думаю, гэтага цалкам дастаткова для таго, каб забяспечыць належны выгляд настаўніка і такім чынам гэтае пытанне развязаць.

Уводзіць нейкую адмысловую форму для настаўнікаў - гэта абсалютна неразумная пастанова, бо, па-першае, гэта абцяжарванне невялікага бюджэту выкладчыцкага складу, а, па-другое, зноў «Беллегпрам» будзе лабіяваць свае інтарэсы і гэта вельмі кепска.

- Як вы мяркуеце, наколькі нармальна ўводзіць такія змены праз капрызы бацькі аднаго дзіцяці?

- Я разумею, што многія працэсы нашай улады не бачныя для нас, бо гэта вельмі закрытая структура. Мы спрабуем зразумець, што ж там адбываецца адпаведна з такімі абрыўкамі заяваў.

Цалкам магчыма, што ў іх ёсць яшчэ нейкія абгрунтаванні таго, чаму трэба пачынаць вучобу з 9 раніцы, але я мяркую, што гэта ненармальна, што ў нас замест таго, каб павышаць якасць адукацыі, пачынаюць займацца вось такімі справамі і форма становіцца важнейшай за змест, у тым ліку і школьная форма становіцца важнейшай за тое, што даюць у школе.