Пра што маўчыць Лукашэнка на «педсавеце»

Тры самыя «нязручныя» пытанні для дыктатара.

Сёння, 24 жніўня, Лукашэнка возьме ўдзел у маштабным педагагічным савеце. Усяго на мерапрыемства запрошана больш за 800 чалавек, паведамляе прэс-служба Лукашэнкі. Пры гэтым прапагандысты падкрэслівае, што педсавет пройдзе ў максімальна адкрытым і дыскусійным ключы, яго ўдзельнікі ў «фармаце адкрытага мікрафона змогуць падзяліцца сваімі думкамі і досведам па тых ці іншых пытаннях».

Гучыць прыгожа і шматспадзеўна, але ёсць усё ж сумневы ў тым, што на ўсе пытанні будуць атрыманыя адказы. Ды і наўрад ці гэтыя пытанні патрапяць у фармат «адкрытага мікрафона». Таму найбольш набалелыя з іх незалежныя журналісты агучылі на сайце gazetaby.com.

Калі ў школах і дзіцячых садках спыняцца паборы з бацькоў?

І гэтае пытанне адрасуецца не адміністрацыям навучальных устаноў, пастаўленых у такія ўмовы, калі без добраахвотна-прымусовай дапамогі бацькоў проста не абысціся.

Калі вучняў школ перастануць з рызыкай для жыцця адпраўляць на калгасныя палі?

Наўрад ці варта нагадваць, чым скончылася трагічная гісторыя пад Маладзечна.

Калі скончацца эксперыменты над сістэмай адукацыі?

Штогод мы чуем пра неабходнасць перапісаць праграмы і падручнікі. Сёлета ўзяліся за перанос заняткаў, задумаліся аб скасаванні 10-бальнай сістэмы. Адсюль галоўнае пытанне: на што былі выдаткаваныя дваццаць гадоў, калі чыноўнікі, уключаючы кіраўніка краіны, дагэтуль не ведаюць, што лепш - 5 балаў або 10.