У школах Менскага раёна заняткі будуць пачынацца а 9.00

У Астрашыцка-Гарадоцкай сярэдняй школе ўведзены графік «пад Колю».

У школе, дзе вучыцца малодшы сын Лукашэнкі, навучальныя заняткі сёлета будуць пачынацца з 9.00 раніцы. Летась яны пачыналіся з 8.00. Пра гэта tut.by распавялі ў самой школе.

- Заняткі будуць пачынацца, як і ва ўсіх навучальных установах Менскага раёна, - заўважылі ў школе, удакладніўшы, што час пачатку урокаў перанеслі на 9.00.

Нагадаем, сёння адзіная пастанова ў пытанні пачатку вучэбных заняткаў у школах і гімназіях не прынятая. Некаторыя сталічныя гімназіі ўжо паведамілі вучням, што першы ўрок будзе пачынацца а 8.30, іншыя ж перайшлі на заняткі з 9.00 раніцы. Напрыклад, па паведамленнях бацькоў, у сталічных гімназіях № 12 і № 32 ўрокі будуць пачынацца з 8.30, а ў шэрагу школ бацькам падчас першага ўрока пакуль не паведамілі.

У Смаргоні ў Гарадзенскай вобласці, напрыклад, вядома, што ў чатырох школах заняткі будуць пачынацца а 8.30, а ў трох школах і гімназіі - а 9.00.

У Міністэрстве адукацыі і Камітэце адукацыі Менскага гарвыканкама пакуль не змаглі падаць абагульненыя звесткі аб тым, у колькі будуць пачынацца заняткі ў школах і гімназіях у Менску і па краіне. Але нагадалі, што графік вызначаюць адміністрацыі ўстаноў адукацыі.

Нагадаем, 12 траўня Аляксандр Лукашэнка даручыў перагледзець графік працы школ. «Раней 9 раніцы ўрокі пачынаць не трэба», - заявіў Лукашэнка. Пасля гэтага ў многіх школах задумаліся аб новым графіку працы з 1 верасня. Навучальныя ўстановы, якія працуюць у дзве змены, разглядалі варыянт пачынаць заняткі а 8.30 або 9.00, якія працуюць у адну змену - з 9.00. Калі заняткі будуць пачынацца а 9 раніцы, для зручнасці бацькоў, якім рана на працу, школы будуць адкрыты з 8 гадзін. Педагогі прыгледзяць за дзецьмі да пачатку урокаў. Таксама скарацілі школьныя перамены.

26 траўня Аляксандр Лукашэнка расказаў пра рэакцыю на перанос пачатку заняткаў на 9.00 яго малодшага сына Мікалая: «Раніцай адно меркаванне я ўжо атрымаў: ты не тое робіш, не трэба а 9 гадзіне. Як бацькі дзяцей павязуць?».