Малдова ў ААН заклікала РФ вывесці свае войскі з Прыднястроўя
10- 22.09.2017, 20:26
- 16,458
Расейскія войскі знаходзяцца на тэрыторыі Малдовы насуперак міжнароднаму праву.
Прэм'ер-міністр Малдовы Павел Філіп, выступаючы на Генеральнай асамблеі ААН, запатрабаваў поўнага і безумоўнага вываду расейскіх войскаў, незаконна раскватараваных на тэрыторыі прыднястроўскага рэгіёну. Пра гэта паведамляе «Укринформ».
«Мы пацвярджаем сваё патрабаванне аб поўным і безумоўным вывадзе так званай Аператыўнай групы расейскіх войскаў, якая з'яўляецца «спадчынніцай» 14-й арміі СССР і незаконна раскватараваная на тэрыторыі нашай краіны», - заявіў малдаўскі прэм'ер.
Філіп адзначыў, што вайсковыя вучэнні, якія праходзяць на пастаяннай аснове ў рэгіёне з удзелам расейскіх войскаў і войскаў непрызнанага Прыднястроўя, з'яўляюцца выклікам нацыянальнай бяспецы Малдовы.
Прэм'ер-міністр падкрэсліў, што насуперак фундаментальным прынцыпам міжнароднага права, палажэнняў Канстытуцыі Малдовы і ўзятых Расеяй на сябе абавязанняў, расейскія войскі дагэтуль знаходзяцца на тэрыторыі Малдовы.
Нагадаем, Генеральная асамблея ААН адклала да кастрычніка разгляд пытання аб вывадзе расейскіх войскаў з Прыднястроўя.