Дзень без аўтамабіляў у Менску закончыўся вялізнымі коркамі

Многія кіроўцы не ведалі пра абмежаванні руху для транспарту і нечакана натыкаліся на «цэглу».

Еўрапейскі тыдзень мабільнасці закончыўся Дзень без аўтамабіля, які ўчора ў Менску правялі маштабней, чым у мінулыя гады: адбыліся святочныя мерапрыемствы, для транспарту перацялі адцінак вуліцы Леніна. І пакуль народ там забаўляўся, на суседніх вуліцах у корках прастойвалі аўтамабілісты, піша tut.by.

Пасля 16.00 - да пачатку праграмы, заяўленай арганізатарамі, на вызваленай ад аўто вуліцы Леніна сабралася шмат людзей, у асноўным групы школьнікаў і бацькі з дзецьмі.

Пасля 18.00 народу прыкметна дадалося - пасля заканчэння працоўнага дня падцягнуліся дарослыя.

На сцэне побач з мастацкім музеем выступалі музычныя калектывы, побач з ёй купка дзяцей пляскала над галавой далонькамі - лавілі мыльныя бурбалкі, якія пускаў жоўты клоўн, тут жа з'явілася чарга з ахвотных нанесці сабе аквагрым. Дарослыя і дзеці хутчэй круціліся каля сталоў, за якімі праводзілі віктарыны, з цікаўнасцю разглядалі імпартныя і айчынны электрамабілі, электрасамакаты і ровары.

- Крута, Серж! Давай мы залезем таксама! - захоплена закрычаў хлапчук гадоў трынаццаці свайму сябру, калі ўбачыў перакулены аўтамабіль, які прывезлі на мерапрыемства МНС.

- Не, там на ровары даюць бясплатна праехаць, пайшлі туды хутчэй, а то разбяруць, - цягнуў у іншы бок Сяргей.

Некаторыя мінакі пра Дзень без аўтамабіля даведваліся выпадкова - ішлі з універмага і ўбачылі, што на вуліцы Леніна «адбываецца нешта дзіўнае пад музыку», таму надумалі пацікавіцца і зайшлі.

- Мне аўтамабілі асабліва не зашкодзілі. Ну, а што іх забараняць, жыць жа добра і прыгожа ўсё хочуць. Наўрад ці багаты чалавек, у якога ёсць дарагі аўтамабіль, будзе на аўтобусе ездзіць, - разважае Яўгенія.

А вось 20-гадовы студэнт БДУ Дзяніс пра Дзень без аўтамабіля ведае і «двума рукамі» падтрымлівае. Усё лета, вясну і восень (калі дазваляе надвор'е) хлопец ездзіць на ровары, у тым ліку і на заняткі.

- Файна, што ровары цяпер сталі папулярныя, - гэта і для здароўя добра, і на экалогію дрэнна не ўплывае. Шкада толькі, што варункі для руху веласіпедыстаў не вельмі ў нас добрыя: па праезнай частцы ездзіць нельга, а ехаць хутка па ходніках немагчыма - на кола каго-небудзь наматаю. Вось калі б аўтамабілістаў трохі на дарозе дазволілі пацясніць, ну сапраўды, аўто занадта шмат, нават сёння.

Прыпаднятага настрою наведвальнікаў святочных мерапрыемстваў не падзялялі аўтамабілісты і іх пасажыры. Многія кіроўцы не ведалі пра абмежаванне руху для транспарту і нечакана натыкаліся на «цэглу» на вуліцы Леніна. Некаторыя кіроўцы агрэсіўна рэагавалі на тое, што выехаць па Леніна на праспект Незалежнасці ў іх не атрымаецца: сігналілі аўтамабілям, што крыху замаруджваліся, паказвалі непрыстойныя жэсты і выкрыквалі лаянкі, хтосьці рэзка разварочваўся на маленькім скрыжаванні, ды так, што заскокваў пры гэтым коламі на ходнік.

Асноўная частка аўто з вуліцы Леніна рухалася на аднапалосную вуліцу Камсамольскую, дзе трапляла ў корак, які пачынаўся адразу ад скрыжавання побач са стадыёнам «Дынама». Кіроўцы выходзілі са сваіх аўтамабіляў і спрабавалі разглядзець, што ж там наперадзе і чаму праехаць так цяжка.

У корку стаяў Mercedes з латышскімі нумарамі.

- Дзень без аўтамабіля? Не чуў пра такое. У Латвіі такога дня няма, - здзіўлена падняў бровы кіроўца і з балтыйскім спакоем ацаніў дарожную сітуацыю: - Ну так, корак. Але нічога страшнага, праедзем ж калі-небудзь.

- Які Дзень без аўтамабіля? Аўто, па-мойму, больш, чым у звычайныя дні, - сказаў кіроўца Opel, які стаяў у корку.

На праспекце Незалежнасці сітуацыя на дарозе была таксама няпростая, а дакладней, транспарт на галоўнай вуліцы сталіцы ў абодва бакі рухаўся вельмі павольна...

У некаторых кіроўцаў не ставала цярпення, і яны разварочваліся праз падвойную суцэльную лінію ў адваротным кірунку, дзе аўто было трохі менш.

- Палундра! Адыходзьце вы ад дарогі, аўто колькі, а вунь аўтобус едзе, а раптам зачэпіць? - закрычаў прыбіральшчык у аранжавай камізэльцы і прыстрашыў венікам.