Тэхагляд: Якія дакументы патрэбныя і за што давядзецца заплаціць

Як выглядае працэдура пераносу адзнакі аб Дзяржтэхаглядзе пры змене ўладальніка аўтамабіля.

«Распавядзіце аб працэдуры пераносу адзнакі аб Дзяржтэхаглядзе пры змене ўладальніка аўтамабіля. Якія дакументы для гэтага патрэбныя? Ці трэба звяртацца менавіта на тую станцыю, дзе папярэдні ўладальнік апошні раз праходзіў ТА? Да таго ж кажуць, што за гэта трэба будзе плаціць», піша abw.by.

Як мы памятаем, з 1 студзеня дзяржава пайшла насустрач аўтаўладальнікам і афіцыйна дазволіла пераносіць адзнаку аб ТА пры дзяржрэгістрацыі транспартнага сродку новым уласнікам, калі тэрмін дзеяння дазволу на допуск да ўдзелу ў дарожным руху не мінуў.

Для ажыццяўлення гэтай працэдуры новаму ўладальніку аўтамабіля трэба прыехаць на якую-небудзь дыягнастычную станцыю і паказаць:

• налепку з нумарам праходжання ТА (тую, якая лепіцца на лабавую шыбу);

• заяву аб пераносе адзнакі ў сертыфікат аб праходжанні дзяржтэхагляду (маецца на сайце УП «Белтэхагляд» і на дыягнастычных станцыях);

• грамадзянскі пашпарт уладальніка аўтамабіля (патрэбен для запаўнення заявы);

• дакумент, які пацвярджае факт платы за паслугу для пошуку і апрацоўкі звестак, неабходных для пераносу адзнакі ў сертыфікат.

Пры наяўнасці налепкі (калі яна не страчаная) працэдура пераносу праходзіць даволі хутка. Некаторыя станцыі могуць прымаць аплату (8,58 руб) На месцы гатоўкай (трэба ўдакладняць такую магчымасць), паслугу таксама можна аплаціць у банку (пазначыць аператару прызначэнне аплаты - за перанос адзнакі аб ТА) і з дапамогай інтэрнэт-банкінгу праз АРІП. Рэквізіты аплаты для Менска можна знайсці тут, у самым канцы публічнай дамовы платнага надання паслуг.

Калі налепка не захавалася, менчукам і жыхарам Менскай вобласці давядзецца з усімі астатнімі дакументамі ехаць у філіял УП «Белтэхагляд» г. Менска і Менскай вобласці, размешчаны па адрасе: вул. Сацыялістычная, 26 (тэлефон для даведак 8-017-380-09-01), і там пацвярджаць факт праходжання тэхагляду паводле наяўнай базы. Там жа адзнаку аб ТА перанясуць у новы сертыфікат.

У сувязі з гэтай інфармацыяй у чытачоў могуць з'явіцца мінімум два пытанні: чаму супрацоўнікі дыягнастычных станцый не могуць на месцы праверыць, ці праходзіў аўтамабіль тэхагляд, у выпадку адсутнасці налепкі, калі ў іх ёсць агульная база, і за што плаціць 8,58 руб, калі чалавек сам падае ўсе неабходныя дакументы?

У першым пытанні ў філіяле Менска і вобласці журналісту ABW.BY адказалі, што іншыя дыягнастычныя станцыі маюць «урэзаны» пошук па базе, а пашыраны ёсць толькі ў іх. Наяўнасць дыягнастычнай мапы (у ёй ёсць нумар дазволу ТА) пры адсутнасці налепкі тэарэтычна можа спрасціць працэдуру, але не факт, бо інструкцыі загадваюць работніку станцыі прыняць ад заяўніка пэўны набор дакументаў: заяву, дазвол, аплату. У прынцыпе развязаць праблему можна было б званком інжынера ў філіял, але рабіць гэта ён не абавязаны, і наогул «ёсць правілы».

Другое пытанне застаецца адкрытым...