Беларусы могуць онлайн даведацца пра свае штрафы і запазычанасці
6- 16.01.2018, 18:25
- 29,221
У ведамстве ўдакладняюць, што інфармацыя ў рэестры носіць даведачны характар.
Беларусы могуць у анлайн-рэжыме атрымаць інфармацыю пра запазычанасці паводле выканаўчых дакументаў, паведамілі ў Міністэрстве юстыцыі. Гэтыя звесткі размешчаны ў спецыяльным рэестры на сайце ведамства. Інфармацыя даступная як фізічным асобам, так і юрыдычным асобам, пачынаючы з 15 жніўня 2017 года, піша tut.by.
- Гэты інфармацыйны рэсурс змяшчае даведачную інфармацыю пра запазычанасці грамадзян, юрыдычных асоб, а таксама іншых суб'ектаў, якія спаганяюцца органамі прымусовага выканання, - тлумачаць у Мінюсце. - У рэестры змяшчаюцца звесткі аб выканаўчых дакументах, якія знаходзяцца на выкананні ў органах прымусовага выканання больш за 30 дзён.
У рэестры таксама можна знайсці інфармацыю пра выканаўчыя дакументы, спагнанне паводле якіх спыненае, да прыкладу, праз ліквідацыю, банкруцтва завінавачанага.
Каб атрымаць інфармацыю, трэба ўвесці пашпартныя звесткі - Прозвішча, імя і ідэнтыфікацыйны нумар.
У ведамстве ўдакладняюць, што інфармацыя ў рэестры носіць даведачны характар, за яе ўдакладненнем неабходна звяртацца ў органы прымусовага выканання.
- Рэсурс дазволіць грамадзянам і суб'ектам гаспадарання атрымаць актуальную інфармацыю пра свае абавязкі ў мэтах прыняцця мер па іх выплаце і прадухіленню негатыўных наступстваў, звязаных з іх прымусовым спагнаннем судовымі выканаўцамі, - кажуць у ведамстве.