Вызваленне Данбаса: ёсць тры моманты

Знайдзіце за апошнія 50 гадоў хоць адзін такі выпадак - будзе вельмі цікава.

Законапраект "Аб асаблівасцях дзяржаўнай палітыкі ў забеспячэнні дзяржаўнага суверэнітэту Украіны над часова акупаванымі тэрыторыямі ў Данецкай і Луганскай абласцях" (таксама названы законам аб дэакупацыі або рэінтэграцыі Данбаса), які спрабуе прыняць Вярхоўная Рада, павінен мець мінімум тры наступствы, якія зменяць сітуацыю вакол АРДЛА. Якія менавіта, "Апостроф" распавёў намеснік міністра ў пытаннях часова акупаваных тэрыторый і ўнутрана перамешчаных асоб Юрый Грымчак:

- Першы момант, які я б адзначыў, - гэта тое, што законапраект прызнае Расейскую Федэрацыю краінай-агрэсарам на тэрыторыі АРДЛА. І гэта фактычна перакрэслівае ўсе магчымасці РФ узяць удзел у міратворчай аперацыі на тэрыторыі АРДЛА. Нашы дыпламаты проста будуць спасылацца на дзейнае заканадаўства, у якім Расея будзе прызнавацца краінай-агрэсарам не толькі ў Крыме, але і на тэрыторыі АРДЛА. І таму яна не можа быць членам міратворчай місіі ААН.

Тут можна падкрэсліць, што і хаўруснікі РФ у АДКБ (Арганізацыя дамовы аб калектыўнай бяспецы, - "Апостроф") не могуць знаходзіцца ў міратворчай місіі. Гэта першае.

Другое - так званая спасылка на 51 артыкул Статута ААН аб тым, што кожная краіна мае права на самаабарону. Гэта значыць, у сувязі з расейскай агрэсіяй мы атрымаем тое, што мы абараняемся, пераводзячы на больш-менш зразумелую мову.

І трэцяе - мы разумеем, што фактычна на сёння з першай лініі цалкам адведзеная Нацыянальная гвардыя, там прысутнічаюць толькі Узброеныя сілы Украіны. Таму аператыўны штаб, які будзе ачольваць вайсковец, спросціць кіраванне войскамі ў гэтай сітуацыі.

Ці будуць прынятыя папраўкі, якіх амаль 700 (16 студзеня дэпутаты разгледзелі больш за 480 паправак да закона, не прыняўшы ніводнай, - "Апостроф")? Я думаю, што ў законе будзе вялікая частка з таго, за што прагаласавалі ў першым чытанні. А ўсе гэтыя папраўкі з'яўляюцца нелагічнымі. Напрыклад, гэта спроба ў закон аб дзяржаўнай палітыцы ў дачыненні да асобных тэрыторый у Данецкай і Луганскай абласцях дадаць Крым, дадаць яшчэ нейкую дату пачатку агрэсіі або пачатку акупацыі і г.д. Гэтыя папраўкі не ўкладваюцца нават у логіку самога законапраекта і, таму, я думаю, гэты законапраект будзе прыняты ў тым выглядзе, у якім ён падаваўся.

Што тычыцца гандлю, пра што шмат кажуць у СМІ (пра тое, што закон можа аднавіць гандаль з акупаванымі часткамі Данецкай і Луганскай абласцей, - "Апостроф"). На сёння дазвол на перавозку ўсіх тавараў праз лінію размежавання дае антытэрарыстычны штаб. А цяпер (пасля прыняцця закона, - "Апостроф") гэтым будзе займацца аператыўны штаб. Мы падаем свае заўвагі як міністэрства, іншыя зацікаўленыя структуры падаюць, але гэта будзе не 100-адсоткава ваенны штаб, а аператыўны штаб, дзе кіраўніцтва будзе вайсковым. Але ў аператыўным штабе таксама, я думаю, будуць прадстаўнікі вайскова-грамадзянскіх адміністрацый, бо яны там знаходзяцца, магчыма, іншых грамадзянскіх цэнтральных органаў. І таму будзе прымацца пастанова аб перамяшчэнні тавараў праз лінію размежавання. То бок, гэта не гандаль у тым выглядзе, пра які мы гаворым.

Напрыклад, на сёння Украіна дазваляе вывозіць на аднаго чалавека з кантраляванай тэрыторыі ў АРДЛА 75 кг тавараў. Ёсць пералік, што можна вывозіць, а што забаронена для вывазу. Вось і ўсё.

Ці можа Украіна абвясціць вайну Расеі, калі апошняя будзе афіцыйна названая агрэсарам? А вы знайдзіце за апошнія 50 гадоў хоць адзін выпадак, калі была абвешчаная вайна - гэта будзе вельмі цікава. Такога няма. Пасля Другой сусветнай само паняцце "вайна" перастала быць законным метадам развязання канфлікту. Гэта значыць, датуль вайна як сродак прызнавалася міжнародным заканадаўствам. А пасля Другой сусветнай вайны фактычна ніводная вайна не была абвешчаная, у нас амаль усе войны на планеце Зямлі былі неабвешчанымі.