Калі Лукашэнка пацісне руку астатняму ІП раздробнага гандлю?

Мяркуючы са звестак статыстыкі, гэты дзень не так ужо і далёка.

Дзеянне ўказа №222 прывяло да таго, што бюджэт штогод недаатрымлівае амаль 100 млн даляраў на год і краіна пазбавілася больш як 26 тысяч ІП і іх працоўных месцаў, гаворыцца ў артыкуле на сайце РГА «Пэрспэктыва».

У сувязі з гэтым кіраўніцтва арганізацыі звярнулася ў савет міністраў і адміністрацыю Лукашэнкі:

«Паводле звестак, выдадзеных Нацыянальным статыстычным камітэтам Рэспублікі Беларусь РГА «Пэрспэктыва»:

за перыяд з 2011 да 2016 года колькасць ІП у раздробным гандлі (далей ІП) зменшылася на 26 235 чалавек або на 26,7%. У рэгіянальным разрэзе Віцебскай і Гарадзенскай вобласці знізілася на 34,6% і 30,6% адпаведна.

Калі прадоўжыць гэты трэнд, то астатні ІП раздробнага гандлю будзе працаваць у 2028 годзе, засталося 10 гадоў. Прычым, у згаданых Віцебскай і Гарадзенскай абласцях астатніх ІП можна будзе сустрэць ў 2025 і 2027 годзе адпаведна.

Мэтанакіраваная палітыка ўладаў для знішчэння раздробнага гандлёвага рынку ІП, у цэлым па краіне прывяла да падзення даходу апошніх на 673 164 800$ з 2014 да 2016 гадоў, што агулам складае мінус 35,4%. Найбольшыя паказчыкі падзення даходу зафіксаваныя ў Віцебскай вобласці - мінус 40,3%, а таксама ў Магілёўскай вобласці - мінус 39,9%.

Сума плацяжоў, якія паступілі ў бюджэт ад дзейнасці ІП за перыяд з 2011 да 2016 гадоў знізілася ў 1,9 разы, прычым паказальным момантам з'яўляецца перыяд працы ІП да і пасля Указа №222.

Так, напрыклад, сумы плацяжоў у бюджэт дасягнулі найвышэйшага пункту ад ІП у 2013 годзе (адзіны падатак і фіксаваны ПДВ, плюс падвышаны каэфіцыент) і склалі 163 112 500$, а ўжо ў 2016 годзе (праца паводле Указа №222 з дакументамі) тыя ж паступленні ў бюджэт склалі толькі 66 553 300$, значыць адбылося зніжэнне на 96 559 200$, якіх сёння так не стае для развіцця краіны і бюджэту. Калі браць адпаведны перыяд часу паводле гадоў у рэгіёнах, то мацней за ўсё знізіліся сумы паступленняў ад ІП у бюджэт у горадзе Менску - склалі мінус 18 959 600$, а таксама Берасцейскай вобласці - склалі мінус 13 993 500$.

Дзеянне Указа №222 прывяло да таго, што бюджэт штогод недаатрымлівае амаль 100 млн даляраў на год і краіна пазбавілася больш як 26 тысяч ІП і іх працоўных месцаў. Паводле нашых ацэнак стварэнне такой колькасці працоўных месцаў каштавацьме краіне не менш чым 100 млн даляраў (адно месца мінімум 4 000$). І гэта без уліку 2017 года, які на наш погляд будзе яшчэ больш стратным, чым папярэднія.

РГА «Пэрспэктыва» ўсе гэтыя гады на форумах, мітынгах, падчас страйкаў і шэсцяў біла ва ўсе магчымыя званы, аднак у адказ атрымлівала цынічныя адпіскі дзяржорганаў, якія цяпер пры разглядзе звестак статыстыкі можна ацаніць, як халатнасць, некампетэнтнасць альбо прычыненне наўмыснай шкоды краіне безадказнымі чыноўнікамі. Не будзем нікога вылучаць, бо «ўсе над гэтым нядрэнна папрацавалі» і далей вядуць сваю дэструктыўную дзейнасць.

Цяпер становіцца відавочнай неабходнасць прыняцця «Народнага Праекта» РГА «Перспектыва», які прадугледжвае працу ІП паводле прынцыпу патэнтнай сістэмы (як альтэрнатыве існай сістэме падаткаабкладання), якая значна спрашчае вядзенне бізнэсу і дазволіць выправіць сітуацыю.

Перакананыя, што адзінай рацыянальнай пазіцыяй уладаў у сітуацыі, апісанай намі, з'яўляецца вяртанне да канструктыўнага дзвюхстаронняга дыялогу паміж РГА «Пэрспэктыва» і дзяржорганамі на самым высокім узроўні.

Калі ўлады не зробяць належных высноў з пададзенай статыстыкі (і гэта яшчэ не ўсе звесткі, якія апублікаваныя ў звароце), што сведчаць пра катастрафічныя лічбы падзення паказчыкаў паступленняў аплат у бюджэт і скарачэнне працоўных месцаў, можна будзе гаварыць аб правядзенні мэтанакіраванай палітыкі знішчэння цэлага сэктара эканомікі - ІП раздробнага гандлю.

Улічваючы выкладзенае, РГА «Перспектыва» ў тэрміновым парадку патрабуе правядзення двухбаковай сустрэчы на ўзроўні савета міністраў для выпрацоўкі плана мерапрыемстваў для выратавання індывідуальных прадпрымальнікаў у раздробным гандлёвым сэктары, бо асобныя міністэрствы і ўстановы ўжо не здольныя пераламаць сітуацыю да лепшага і магчыма спатрэбіцца шэраг кадравых прызначэнняў.

Мы заклікаем урад, вярнуцца на дарогу разважлівасці і прыняць своечасовыя адэкватныя пастановы, з улікам прапаноў РГА «Пэрспэктыва».