Як пенсіянерка трапілася на вуду «фірмачоў» з Берасця

Аднойчы прагучаў званок хатняга тэлефона.

Жыхарка горада Чавусаў Надзея Шчамялёва распавяла «Народнай Волі», як берасцейскія камерсанты зарабляюць на пенсіянерах.

Надзея Аляксееўна кажа, што шмат у чым у сітуацыі яна вінаватая сама, але мяркуе, што павінна перасцерагчы астатніх людзей, якія таксама могуць паддацца на хітрыкі берасцейскай фірмы.

«Аднойчы прагучаў званок хатняга тэлефона, — распавядае яна. — Мужчына прадставіўся супрацоўнікам берасцейскай фірмы, якая прадае артапедычныя ці то вусцілкі, ці то ўстаўкі. Паведаміў, што ў нашым раённым цэнтры ў такі і такі дзень у такім і такім месцы адбудзецца іх прэзэнтацыя. Запрасіў на акцыю. Я зазвычай з насцярожанасцю стаўлюся да такога кшталту «прэзэнтацый», але ў мяне скаліёз хрыбта, артрыт каленнага сустава, мне вельмі складана перасоўвацца. Суразмоўца праз тэлефон паведаміў, што іхнія вусцілкі — лекавыя, маўляў, дапамогуць мне вылечыцца ад хваробы. Дадаў, што на прэзэнтацыі выступіць дацэнт медыцынскіх навук, які падрабязна раскажа аб гаючых уласцівасцях тавару».

Жанчына не выключае, што падчас акцыі, якую яна наведала, на яе ўздзейнічалі гіпнозам.

«Я, чалавек з вышэйшай адукацыяй, падпісала гэты кантракт, як у тумане, — працягвае Надзея Аляксееўна. — Заваблівалі вельмі проста — падчас укладання кантракту на прэзэнтацыі сцілкі каштавалі 180 рублёў, у Берасці — ужо 300. У мяне пры сабе было толькі 15 рублёў, але зарэгістравалі тавар у растэрміноўку. Прыязджаю дадому, пачынаю чытаць інструкцыю і даведваюся, што мне прадалі вусцілкі ад патлівасці ног. Аб якім тут «вылячэнні» можна казаць? Больш за тое! Раз тавар прададзены ў растэрміноўку, то я павінна выплаціць за сцілкі 300 рублёў. Дарэчы, пагадненне можна было скасаваць, але для гэтага трэба было ехаць у Берасце. Я ледзь рухаюся, таму проста патэлефанавала ў фірму і папрасіла дыстанцыйна скасаваць умову. Заяву магла даслаць поштай. Натуральна, фірма адмовіла ў гэтым і прыстрашыла, што будзе падаваць у суд, калі адмоўлюся аплачваць тавар».

Пасля гэтага 70-гадовая пенсіянерка звярнулася ў міліцыю, але пакуль што яе праблема засталася неразвязанай.

Дарэчы, Надзея Шчамялёва, як выявілася, не самотная: прэтэнзіі да гэтай фірме, ТАА «Трыбунькоф», выстаўляюць людзі з розных гарадоў Беларусі. Напрыклад, гэтую кампанію згадваюць у суполцы сеткі Вконтакте «Несумленныя працадаўцы і фірмы Берасця», дзе карыстальнікі абвінавачваюць яе прадстаўнікоў у накідванні тавараў і паслуг.

Фірма зарэгістраваная афіцыйна і развіваецца: набірае гандлёвых прадстаўнікоў, аператараў тэлефоннага цэнтра і мэнэджэраў продажу. Напрыклад, аплата працы спецыяліста, які тэлефануе кліентам — ад 350 рублёў, з набаўкай за продаж з канферэнцый. Гандлёваму прадстаўніку абяцаюць заробак 800 — 1000 рублёў, менавіта ён адказвае за ўкладанне кантрактаў і крэдытаў. Вядучаму мэнэджару, у чые абавязкі ўваходзіць правядзенне канферэнцый і кіраванне суполкай гандлёвых прадстаўнікоў, абяцаюць заробак ад 1000 рублёў, трохдзённы працоўны тыдзень і поўны сацыяльны пакет.

Як кажуць, продаж пастаўлены «на камерцыйны канвеер», і аб фінансавых магчымасцях пенсіянераў тут, мабыць, думалі менш за ўсё.

«Народная Воля» патэлефанавала ў ТАА «Трыбунькоф» — фірму, якая ўклала пагадненне з пенсіянеркай Шчамялёвай. Спачатку адказала дзяўчына з прыемным голасам.

— Да нас звярнулася пенсіянерка, ўклала пагадненне з вашай фірмай, а цяпер шкадуе аб гэтым. Ці можа яна вярнуць вам гэты тавар?

— Тавар можна вярнуць на працягу 14 дзён, пры ўмове, што ён не быў ва ўжытку...

— Наколькі нам вядома, 14 дзён з моманту куплі ўжо прамінула. Ці значыць гэта, што жанчына будзе плаціць?

— Выходзіць, што так.

— Але...

— Пачакайце хвілінку...

Дзяўчына перадала слухаўку мужчыну. Гутарка прадоўжылася:

— Вам не здаецца, што вусцілкі за 300 рублёў — гэта задорага?

— Не.

— Да нас звярнулася пенсіянерка, якая шкадуе аб куплі вусцілак коштам 300 рублёў...

— А гэта сапраўды былі вусцілкі? У нас няма вусцілак такім коштам...

— Мы гэтае пытанне ўдакладнім...

— Мы нікога не прымушаем што-небудзь купляць. Калі чалавек купіў тавар, значыць, ён яму патрэбны. Якія да нас могуць быць прэтэнзіі?

Што рабіць?

«Я нічога плаціць не меруся, — дадае Надзея Аляксееўна. — Сама вінаватая ў гэтай сітуацыі, але вельмі крыўдна, калі некаторыя несумленныя камерсанты, карыстаючыся старасцю і безабароннасцю пенсіянераў, імкнуцца напхаць сваю кішэню».

Дарэчы, прадстаўнікі таварыства абароны правоў спажыўцоў кажуць, што ў выпадку з артапедычнымі ўстаўкамі пакупнік мае поўнае права вярнуць іх прадаўцу і скасаваць кантракт на падставе давання недакладнай інфармацыі падчас прэзэнтацыі.

Нагадаем, што калі Вы ўжо падпісалі ўмову і вінныя камусьці грошы за тавар, то, паводле закону, усякі тавар нехарчовай групы, калі ён не быў ва ўжытку, Вы маеце права вярнуць на працягу 14 дзён. Акрамя таго, Цывільны кодэкс дае магчымасць прызнаць угоду неправадзейнай, калі ў судзе будзе даведзена, што вы ўклалі яе пад псіхалагічным уздзеяннем альбо не валодалі ўсёй паўнатой інфармацыі аб тавару (паслузе). Такую інфармацыю прадавец абавязаны даць згодна з арт.7 закона аб абароне правоў спажыўцоў. Таму, калі прадавец адмаўляецца ў такім выпадку ісці на кантакт, вы можаце насмелую звяртацца ў суд наўпрост альбо праз таварыства абароны правоў спажыўцоў; прычым суд павінен разгледзець справу без збору.

Галоўная парада на будучыню: кантактуючы з гандлёвымі прадстаўнікамі, не саромейцеся ўдакладняць усе драбніцы, пры магчымасці знайсці час лепей азнаёміцца з таварам і параіцца з дасведчанымі людзьмі, з сябрамі або сваякамі. Калі вы адчуваеце сумневы і вам здаецца, што тавар або паслугу вам накідваюць, варта ветліва падзякаваць прадаўцу і адмовіцца, альбо папрасіць час лепей азнаёміцца з таварам. Інфармацыю аб артапедычных сцілках лепш атрымаць у лекара, у аптэцы або ў спецыялізаванай краме.