Праваабаронца са Светлагорску змагаецца ў судзе за права на правядзенне мірнага сходу

Алена Маслюкова мае намер дайсці да ААН.

16 кастрычніка ў судзе Светлагорскага раёна адбылося папярэдняе паседжанне паводле скаргі праваабаронцы Алены Маслюковай на пастанову мясцовага райвыканкама, які забараніў правядзенне ў горадзе шостага кастрычніка мірнай акцыі супраць працы завода беленай цэлюлозы, піша гомельская «Весна».

Праваабаронца вызначыла звярнуцца ў суд, бо мяркуе, што такая пастанова парушае канстытуцыйнае права грамадзян на мірныя сходы. І гэта далёка не адзіная адмоўная пастанова. Група светлагорскіх актывістаў, у тым ліку і Алена Маслюкова, падалі агулам дзесяць заявак на правядзенне ў горадзе масавых мерапрыемстваў на спецыяльна адведзенай для гэтых мэтаў пляцоўцы - стадыёне «Папернік», аднак ніводная з іх не была задаволеная.

Вядзе грамадзянскую справу суддзя Людміла Сядзько. На пасяджэнні праваабаронца звярнула ўвагу на той факт, што прычына адмовы ў правядзенні мірных сходаў на стадыёне «Папернік» практычна заўсёды адна і тая ж: правядзенне там у патрэбны час спартовых мерапрыемстваў або трэніровак.

Але, напрыклад, шостага кастрычніка і менавіта ў той час, на які актывісты падавалі заяўку (блізу 16 гадзін), на стадыёне нічога не адбывалася. У пацверджанне сваіх слоў Алена Маслюкова прадэманстравала відэа і фота з пустога стадыёна. Суддзя, у сваю чаргу, выслухала ўсе прэтэнзіі і довады Алены.

Са слоў Маслюковай, падчас паседжання суддзя рабіла выгляд, што будзе сур'ёзна разбірацца ў гэтай справе. Аднак надзеі на тое, што справа будзе развязаная на карысць заяўнікаў, праваабаронца не мае.

«У нас ужо ёсць «сумны досвед», звязаны з суддзёй Сядзько. Справа ў тым, што ў чэрвені яна адмовіла ў задавальненні нашай такой скаргі паводле справы аб забароне пікету ў падтрымку Фядыніча і Комліка. Гэта пастанова затым абскарджвалася ў Гомельскім абласным судзе, а цяпер пададзеная скарга ў Вярхоўны суд. І я планую давесці справу да Камітэта ў правах чалавека ААН», - распавяла праваабаронца.

Наступнае паседжанне паводле справы адбудзецца 31 кастрычніка а 14.30.