ЗША дазволілі сваім авіякампаніям аднавіць палёты ў тры гарады Украіны
- 18.10.2018, 21:20
- 9,517
Палёты над Крымам і некаторымі часткамі Украіны не здымаюцца.
Федэральнае авіяцыйнае ўпраўленне ЗША (FAA) паведаміла ў чацвер, што дазволіць амерыканскім авіякампаніям і іх кампаніям-партнёрам аднавіць палёты ў тры ўкраінскія аэрапорты і ў некаторыя часткі Чорнага мора, патлумачыўшы, што сітуацыя там бяспечная.
Пра гэта паведаміла агенцтва Reuters, паведамляе eurointegration.com.
У красавіку 2014 года FAA рэкамендавала амерыканскім авіякампаніям прыпыніць палёты над Крымам і зонамі вайсковага канфлікту ва Украіне і пашырыла зону абмежавання пасля збівання рэйса MH17.
У сваім паведамленні FAA адзначыла, што забарона на палёты над Крымам і некаторымі часткамі Украіны не здымаецца. Аднак кіраванне адзначыла, што дазволіць вылеты і прылёты ў міжнародных аэрапортах Харкава, Дняпра і Запарожжа, дадаўшы, што аперацыі там могуць праводзіцца з «мінімальнай дадатковай рызыкай».
FAA заявіла, што ўмовы бяспекі «істотна стабілізаваліся ў некаторых рэгіёнах Украіны». Акрамя таго, скасаванню абмежавання спрыяла тое, што на працягу больш за два гады палёты неамерыканскіх авіякампаній на чарнаморскіх маршрутах адбываліся бяспечна.
Ведамства таксама патлумачыла, што палёты ў Харкаў дазваляюцца, бо горад размешчаны на бяспечнай адлегласці ад зоны баявых дзеянняў.