«Кусае, скача, палохае»: у Гомелі сабака тэрарызуе ўвесь пад'езд

Трыванне жыхароў лопнула.

З нядаўняга часу жыццё навасёлаў дома №9 на вуліцы Алмазнай ў Гомелі ператварылася ў жах. Прычына яго - чатырохгадовы сабака на мянушку Рой. Жыхары кажуць, што агрэсіўны сабака тэрарызуе ўвесь пад'езд, але яны па-суседску не скандалілі і трывалі - да таго часу, пакуль адную з суседак Рой аднак не ўкусіў, піша tut.by.

Іна паказвае запясце - прайшоў ужо месяц, і раны крыху зацягнуліся. Але што рабіць са страхам, які цяпер перашкаджае жыць?

- У той вечар я спускалася па лесвіцы на прабежку, зашпільвала кофту... Падымаю вочы, а на мяне ляціць адкрытая пашча. Без напысніка, без павадка. Я падставіла аўтаматычна руку - і ён у яе ўчапіўся.

- Іна так крычала, што мы на вуліцы чулі, - падключаюцца да абмеркавання суседзі.

Каля пад'езду сабраліся два дзясяткі чалавек. Амаль у кожнага - асабістая гісторыя пра сустрэчы з Роем.

На Ірыну сабака накінуўся, калі яна выходзіла з ліфта, - балазе быў у напысніку. На Вольгу - каля смеццевых кантэйнераў. Маладая мама Юлія распавядае, як давялося літаральна за каўнер выхопліваць з пашчы сабакі падгадаваную дачку.

Ва ўсіх выпадках гадаванца выгульвала 16-гадовая дачка гаспадароў. Жыхары кажуць, што сабаку складана ўтрымаць нават даросламу - не тое што дзіцяці.

Суседзі Роя ўжо гады два не адчуваюць сябе ў бяспецы. Асабліва, кажуць, страшна за дзяцей.

- Выходзіш з ліфта: спачатку сам, потым дзіцяці выводзіш. Тое ж самае, калі ўваходзіш у пад'езд. Але чаму мы павінны баяцца ва ўласным доме? - здзіўляецца Сяргей.

Гаспадыня Роя Алена мяркуе, што суседзі перабольшваюць маштаб праблемы.

- Рой проста не любіць ездзіць у ліфце. Ён яго баіцца і імкнецца заўсёды выбегчы, яго палохае закрытая прастора. У пад'ездзе ён таксама заўсёды нервуецца. Адсюль і такая рэакцыя. Мы звярнуліся да кінолага, ён сказаў, што сабака не агрэсіўны, яго паводзіны паддаюцца карэкцыі. Цяпер мы гэтым займаемся... Мы гатовыя панесці адказнасць, заплаціць усе штрафы, людзі звернуцца ў міліцыю ці суд, але пазбавіцца ад яго... Як вы сабе гэта ўяўляеце? Забіць?

Алена сцвярджае, што апошнім часам сабаку выгульваюць толькі ў напысніку, толькі ейны муж і толькі пасля 10-й вечара - і абяцае, што надалей так і будзе.

Зрэшты, суседзі не вераць, што гэтых абяцанняў хопіць надоўга - і па-ранейшаму з асцярогай заходзяць ва ўласны пад'езд.

- Цяпер я шкадую, што тады, пасля нападу, не звярнулася ў суд. Гаспадар прасіў не рабіць гэтага: маўляў, у дачкі на носе паступленне, не трэба лішніх стрэсаў, паабяцаў пазбавіцца ад сабакі. Мы пайшлі насустрач, але праз тыдзень ён сказаў, што выбачайце, сабаку ён знішчаць не будзе, - распавядае Іна.

- Заявы нічога не дадуць, максімум ім выпішуць штраф за парушэнне правілаў утрымання свойскіх жывёлін, - упэўненыя суседзі. - Але ў нас ва ўсіх дзеці, мы не можам сядзець і чакаць бяды, тым больш, што прэцэдэнт ужо ёсць.

Цяпер усе парушэнні падчас выгулу Роя жыхары збіраюцца фіксаваць на фота, каб затым аднесці здымкі ў пракуратуру.