СМІ: Звесткі пра расейскага шпіёна Аўстрыі перадала брытанская выведка
- 12.11.2018, 10:11
- 8,040
Гэта было зроблена з мэтай змяніць стаўленне Вены да Масквы.
Аўстрыя атрымала інфармацыю пра аўстрыйскага палкоўніка, якога абвінавацілі ў шпіянажы на Расею, ад спецслужбаў Вялікабрытаніі, паведамляе газета Kleine Zeitung са спасылкай на суразмоўцу ў Мінабароны Аўстрыі.
Паводле інфармацыі крыніцы выдання, Брытанія перадала звесткі пра расейскага агента з мэтай змяніць стаўленне Вены да Масквы.
Адзначаецца, што пастанова перадаць Аўстрыі звесткі пра агента была звязаная з атручваннем у брытанскім Салсбэры экс-палкоўніка ГРУ Сяргея Скрыпаля і ягонай дачкі.
Газета нагадвае, што Вена адмовілася высылаць расейскіх дыпламатаў праз скандал з атручваннем.
Раней аўстрыйскае выданне Profil паведамляла, што Аўстрыя атрымала інфармацыю пра экс-палкоўніка Узброеных сіл, які працаваў на выведку РФ, ад Нямеччыны.
Нагадаем, у Аўстрыі затрымалі экс-палкоўніка Узброеных сілаў краіны паводле падазрэння ў працы на расейскую выведку з канца 1990-х гадоў.
Расследаванне вядзецца ў дачыненні да 70-гадовага аўстрыйскага палкоўніка ў адстаўцы, які перадаваў расейскай вайсковай выведцы інфармацыю аб міграцыйным крызісе, аўстрыйскай вайсковай авіяцыі і артылерыйскіх сістэмах, а таксама дэталёвую інфармацыю пра шмат якіх аўстрыйскіх высокапастаўленых вайскоўцаў.
Са звестак выдання, за свае паслугі палкоўнік з Зальцбурга атрымаў блізу 300 тысяч еўра.
Акрамя таго, са звестак Kronen Zeitung, быў раскрыты супрацоўнік Федэральнага міністэрства абароны Канстытуцыі і барацьбы з тэрарызмам (BVT), які шпіёніў на карысць Расеі.