Прэзідэнт Польшчы падрыхтаваў праект кампенсацый сасланым у Сібір

Сасланым у Сібір палякам выплацяць фінансавую дапамогу.

Прэзідэнт Польшчы Дуда накіраваў у Сойм законапраект аб фінансавай дапамозе асобам, якія знаходзіліся ў ссылцы або былі дэпартаваныя ў СССР на працягу 1939-1956 гадоў.

Пра гэта паведамляе прэс-служба кіраўніка дзяржавы.

У дакуменце гаворыцца аб выдаванні так званым сібіракам фінансавай дапамогі сумаю, якая залежыць ад працягласці іх ссылкі або дэпартацыі. За кожны поўны месяц такія асобы павінны атрымаць 200 злотых (блізу 47 еўраў) кампенсацыі, аднак агульная сума не можа быць меншая, чым 2400 злотых (амаль 560 еўраў). Суму дапамогі будзе вызначаць Упраўленне сацыяльнага страхавання.

Грашовую кампенсацыю атрымаюць як асобы, якіх вывезлі з тэрыторыі польскай дзяржавы ўглыб СССР, дзе яны знаходзіліся ў ссылцы, так і асобы, якія нарадзіліся ў ссылцы.

Дуда прадугледзеў дзве ўмовы атрымання кампенсацыі: пацверджаны рашэннем кіраўніка Упраўлення ў справах замежнікаў і рэпрэсаваных асоб дакумент аб перыядзе знаходжання ў ссылцы або дэпартацыі і польскае грамадзянства на момант падачы заявы.