У Вярхоўнай радзе адмовіліся падтрымаць адстаўку генпракурора Украіны Луцэнкі

За магчымую адстаўку Юрыя Луцэнкі прагаласавалі 38 парламентарыяў, супраць - 116.

Вярхоўная рада Украіны ў аўторак, 6 лістапада, правяла галасаванне паводле заявы генеральнага пракурора краіны Юрыя Луцэнкі, які ў гэты ж дзень падаў прашэнне аб сваёй адстаўцы. Луцэнку падтрымалі 38 дэпутатаў, яшчэ 116 парламентарыяў прагаласавалі супраць магчымай адстаўкі генпракурора, 173 дэпутаты не ўдзельнічалі ў галасаванні.

Сваю пастанову Луцэнка звязаў з абвінавачваннямі ў нядобрасумленным расследаванні справы аб смерці дарадчыцы мэра Херсона Кацярыны Гандзюк, заявіўшы пра «прапагандысцкую кампанію». Адначасова генпракурор назваў «піярам на крыві» заявы, у якіх віна за забойства Гандзюк ускладалася на прадстаўнікоў уладаў. Спроба распаўсюдзіць у СМІ толькі адну версію забойства таксама негатыўна адбілася на ходзе расследавання, падкрэсліў ён.

Прэзідэнт краіны Пятро Парашэнка пакуль не адрэагаваў на прашэнне Луцэнкі аб адстаўцы.

Пазней дэпутат Рады ад фракцыі «Блок Пятра Парашэнкі», журналіст Мустафа Наем назваў «хлуслівай» заяву Луцэнкі аб адстаўцы. Напярэдадні Наем паведаміў пра патрабаванні некалькіх парламентарыяў стварыць камісію для расследавання нападаў на грамадскіх актывістаў за апошнія два гады.

Гандзюк памерла пасля нападу ў ліпені

Дарадчыца мэра Херсона і грамадская дзеячка Кацярына Гандзюк 4 лістапада памерла ў кіеўскай бальніцы ад наступстваў нападу, які адбыўся тры месяцы таму. 31 ліпеня ў Херсоне невядомы абліў яе сернай кіслатой. Жанчына атрымала хімічны апёк больш за 30 адсоткаў паверхні цела.

Нацыянальная паліцыя Украіны перакваліфікавала напад на Гандзюк з замаху на наўмыснае забойства. Расследаванне праводзіць Служба бяспекі Украіны. Сама Гандзюк лічыла замоўцамі нападу супрацоўнікаў праваахоўных органаў. Актывістка вінаваціла ў карупцыі мясцовых паліцэйскіх і чыноўнікаў, а таксама канфліктавала з прарасейскімі палітыкамі.