Кошт нафты маркі Brent упершыню за год зменшыўся ніжэй за $57

Увечары ў аўторак кошт барэля Brent апусціўся больш чым на 4%, барэль WTI патаннеў на 5,5%.

Увечары 18 снежня на біржах аднавілася падзенне нафтавых каціровак. Пасля 19:00 паводле Менску кошт барэля нафты маркі Brent упершыню больш чым за год апусціўся ніжэй за $57. На мінімуме кошт дасягнуў адзнакі $56,87, што на 4,6%, або $2,74, ніжэй за ўзровень закрыцця таргоў панядзелка. У папярэдні раз танней $57 за барэль Brent каштаваў 20 кастрычніка 2017 года, паведамляе РБК.

Нафта маркі WTI патаннела яшчэ мацней: вечарам 18 снежня кошт барэля WTI апускаўся да $47,28, што на 5,8% ніжэй за ўзровень закрыцця папярэдніх таргоў. Дасягнуты ў аўторак ўзровень быў самым нізкім з 11 верасня 2017 года.

Падзенне нафтавых коштаў працягваецца трэці гандлёвы дзень запар. Напярэдадні, 17 снежня, барэль Brent за паўдня патаннеў больш чым на $2, але затым каціроўкі трохі скарэктаваліся, і гандаль зачыніўся зніжэннем коштаў на 1,1%.

Агенцтва CNBC са спасылкай на аналітыкаў прагназуе, што ў найбліжэйшыя тыдні кошты нафты працягнуць зніжацца ў сувязі з узмацненнем асцярог гульцоў з нагоды празмернасці сыравіны на рынку.

«Адзіны шлях - уніз», - цытуе CNBC Тамас Варга, старэйшага аналітыка кампаніі PVM Oil Associates. У сваёй аналітычнай запісцы Варга адзначае, што ў нафтавых «быкоў» няма падстаў для аптымізму.

У канцы мінулага тыдня Міжнароднае энэргетычнае агенцтва прагназавала, што дасягнутая падчас сустрэчы ўдзельнікаў Арганізацыі краін - экспарцёраў нафты і якія не ўваходзяць у картэль дзяржаў (АПЕК +) дамоўленасць аб абмежаванні нафтаздабычы дазволіць знізіць валацільнасць на нафтавым рынку і стабілізаваць кошты ў раёне $60 за барэль.

Пра заключэнне ўгоды АПЕК+, у рамках якой аб'ём сутачнай здабычы нафты плануецца скараціць на 1,2 млн бар., было абвешчана 7 снежня 2018 года.