Купалаўскія чытанні правялі ў ізраільскім Ашдодзе
- 25.12.2018, 15:16
- 8,677
На чытаннях прагучаў перакладзены сёлета на іўрыт верш «А хто там ідзе?»
Традыцыйныя Купалаўскія чытанні адбыліся ў ізраільскім горадзе Ашдодзе 24 снежня - на плошчы, якая носіць імя народнага паэта Беларусі, паведамілі БелТА арганізатары мерапрыемства.
У чытаннях ўзяў удзел пасол Беларусі ў Ізраілі Уладзімір Скварцоў. Ён звярнуў увагу, што Янку Купалу звязвала асабістае сяброўства з многімі габрэйскімі паэтамі, пісьменнікамі, мастакамі і скульптарамі. Частку сваіх твораў ён прысвяціў габрэйскай тэматыцы.
Уладзімір Скварцоў прывёў урывак з няскончанай балады «9 асiнавых колляў». У ёй распавядаецца пра падзеі Вялікай Айчыннай вайны: мясцовыя жыхары - беларусы адмовіліся ўдзельнічаць у пакаранні габрэяў і былі закатаваныя разам з імі.
На Купалаўскіх чытаннях выступілі выхадцы з Беларусі, сябры літаратурнага аб'яднання «Ветразь». Яны прачыталі ўрыўкі з твораў песняра і іншых беларускіх паэтаў, а таксама вершы ўласнага сачынення.
Прагучаў і перакладзены сёлета на іўрыт верш «А хто там ідзе?». Раней ён быў апублікаваны на больш чым 100 мовах свету.
Прадстаўнікі муніцыпалітэта Ашдода падчас чытанняў адзначылі дасягнуты ўзровень беларуска-ізраільскага супрацоўніцтва ў сферы культуры і падкрэслілі намер і далей садзейнічаць яго развіццю. Арганізатарамі мерапрыемства выступілі мэрыя Ашдода, гарадское аддзяленне Усеізраільскага аб'яднання выхадцаў з Беларусі і пасольства Беларусі ў Ізраілі.