Здабыча нафты ў ЗША выйшла на рэкорд за 50 гадоў
8- 10.02.2018, 19:13
- 13,569
Рост здабычы нафты ў Амерыцы ў канцы мінулага года аказаўся ўдвая большы, чым ацэньвалася першапачаткова.
Ужо ў лістападзе амерыканскія нафтавікі здабывалі 10,038 млн барэляў у дзень, паведамляе сайт finanz.ru са спасылкай на Мінэнерга ЗША.
Удакладнены паказчык апынуўся на 350 тысяч барэляў у дзень большы, чым першая адзнака (9,682 млн барэляў) і стаў амаль рэкордным у гісторыі краіны: больш нафты Штаты пампавалі толькі ў 1970 годзе (10,044 млн барэляў штодня).
За тры месяцы пачынаючы з верасня, на фоне бурнага росту нафтавых каціровак, вытворчасць «чорнага золата» ў Штатах падскочыла на 846 тысяч барэляў за дзень - амаль удвая больш, чым ацэньвалася раней (490 тысяч барэляў).
За год здабыча вырасла на 1,2 млн барэляў у дзень, кампенсаваўшы дзве траціны аб'ёмаў, якія прыбралі з рынку краіны АПЕК і Расея, якія заключылі ў снежні мінулага года пагадненне аб стабілізацыі цэн.
Больш за палову прыросту забяспечыў Тэхас, дзе размешчаны найбуйнейшы сланцавы басейн Permian: да лістапада ў штаце пампавалі штодня 3,891 барэляў у дзень - на 720 тысяч барэляў больш, чым год таму. На чвэрць і больш павялічылі вытворчасць Паўночная Дакота, Нью Мехіка і Агаё.
«Галоўную ролю ў дасягненні такога піка выконваюць сланцывыя здабытчыкі, якія не толькі павялічылі колькасць нафтавых вышак, але і прыкметна палепшылі тэхналогіі, што дазволіла прыкметна знізіць выдаткі на вытворчасць сырой нафты», - кажа аналітык Nordea Дзяніс Давыдаў.
Паводле ацэнкі Rystad Energy, сабекошт аднаго сланцавага барэля з узроўняў 70-80 даляраў у пачатку 2010-х упаў да 35, а пры цэнах вышэй за 50 ЗША змогуць павялічваць здабычу на 1,2 млн барэляў у дзень кожны год аж да 2020-га.
Пакуль сітуацыю згладжвае моцны попыт: у студзені амерыканскія НПЗ закуплялі 20,5 млн барэляў у дзень - на 1,5 млн больш, чым год таму, указвае сыравінны стратэг Ашчадбанк CIB Міхаіл Шэйбе.
Попыт застаецца галоўным невядомым ва ўраўненні рынка: АПЕК спадзяецца, што сусветнай эканоміцы спатрэбіцца 1,7 мільёна барэляў новых штодзённых паставак, Міжнароднае энэргетычнае агенцтва чакае толькі 1,3 млн барэляў.
Пры гэтым здабыча ў ЗША, Бразіліі, Канадзе і Мексіцы, паводле ацэнкі МЭА, вырасце на 1,7 мільёна барэляў, а рынак вернецца ў стан лішку - 0,35 млн барэляў у дзень у трэцім квартале.
«Нафтавыя кошты працягваюць заставацца «паміж двух агнёў»: угода АПЕК + штурхае каціроўкі наверх, тады як амерыканская вытворчасць стварае сур'ёзную пагрозу ў доўгатэрміновай перспектыве», - папярэджвае Давыдаў.