Венесуэла пачала выпуск уласнай крыптавалюты

На першым этапе плануецца рэалізаваць 38,4 мільёна крыптаманет.

Венесуэла ў аўторак, 20 лютага, пачала продаж уласнай крыптавалюты, з дапамогай якой урад у Каракасе спадзяецца пераадолець "фінансавую блакаду" з боку ЗША. На першым этапе плануецца рэалізаваць 38,4 мільёна крыптаманет, якія атрымалі назву El Petro, а ў перспектыве - 100 мільёнаў, піша DW.

"El Petro адновіць давер і бяспеку на нацыянальным і міжнародным рынках", - заявіў у Каракасе віцэ-прэзідэнт Венесуэлы Тарэк аль-Айсамі. Кошт El Petro адпавядае кошту аднаго барэля венесуэльскай нафты, гэта значыць 60 далярам ЗША на сённяшні дзень, але будзе карэктавацца ў залежнасці ад ваганняў на рынках. 20 сакавіка Венесуэла плануе выпусціць у абарачэнне яшчэ 44 млн крыптаманет.

Рэальны актыў

У адрозненне ад пераважнай большасці іншых крыптавалют El Petro забяспечвае рэальны актыў - 5 млрд барэляў нафты з радовішча Аякуча ў нафтаносным поясе ракі Арынока. Улады ў Каракасе спадзяюцца на тое, што ўласная крыптавалюта дазволіць ім больш паспяхова прыцягваць фінансавыя сродкі з-за мяжы.

Венесуэла перажывае глыбокі палітычны і эканамічны крызіс. ЗША ўвялі супраць гэтай краіны эканамічныя санкцыі за пераслед прадстаўнікоў апазіцыі. Некаторыя рэйтынгавыя агенцтвы прыйшлі да высновы, што Венесуэла і дзяржаўны нафтавы канцэрн PDVSA ужо знаходзяцца ў стане частковага дэфолту.