Reuters: Два ключавыя дарадцы Трампа могуць сысці ў адстаўку
1- 25.02.2018, 20:44
- 9,758
Стасункі МакМастэра і Кэлі з прэзідэнтам CША сталі вельмі напружанымі.
Доўгачасовыя супярэчнасці ў поглядах прэзідэнта ЗША Дональда Трампа і двух ягоных паплечнікаў: дарадцы ў нацыянальнай бяспецы і кіраўніка адміністрацыі, - дасягнулі такога пункту, калі яны абодва могуць сысці ў адстаўку.
Пра гэта Reuters распавялі чацвёра неназваныя чыноўнікі з Белага дома, піша zn.ua. Палітычныя аглядальнікі ў ЗША ўважаюць Гербэрта МакМастэра і Джона Кэлі за вайскоўцаў, якія ўплываюць на амерыканскага прэзідэнта, вызначаючы штодзённыя справы ў Белым доме. Яны таксама пераканалі Трампа ў важнасці міжнародных альянсаў, у прыватнасці NATO, якую ён неаднаразова крытыкаваў.
Аднак, усе крыніцы выдання паведамілі, што напружаныя стасункі амерыканскага прэзідэнта з ягонымі ключавымі дарадцамі могуць падарвацца, бо гэта адбылося з іншымі важнымі фігурамі ў амерыканскай палітыцы, якія страцілі ягоную добразычлівасць. Такімі выданне называе Дзяржсакратара Рэкса Тылерсана і Генеральнага пракурора Джэфа Сэшнса.
На пытанне аб магчымай адстаўцы МакМастэра і Кэлі прэс-сакратар Белага дома Радж Шах адказаў, што не бачыць такой магчымасці.
"Прэзідэнт цалкам упэўнены ў кожным чальцы сваёй каманды", - сказаў ён.
У сваю чаргу, прэс-сакратарка Сара Сандэрс сказала, што Трамп "дагэтуль упэўнены ў генерале МакМастэры". Самі ж дарадцы Трампа не адказалі на запыты пракаментаваць такую інфармацыю.
Выданне нагадвае, што прэзідэнт ЗША надоечы раскрытыкаваў свайго дарадцу ў нацыянальнай бяспецы, пасля таго, як МакМастэр у Еўропе абвясціў, што не сумняваецца ва ўмяшанні Расеі ў амерыканскія выбары, якое Трамп адмаўляе.
Раней МакМастэр паказаў на неабходнасць супрацьстаяць агрэсіўным паводзінам Расеі. Ён звярнуў увагу на тое, што Масква падтрымлівае "левых" і "правых" радыкалаў для таго, каб стварыць напружанне і "падарваць нашу ўпэўненасць у тым, хто мы ёсць напраўду".
Таксама дарадца Трамп абвінаваціў Расею ў рэвізіянізме і пачатку вайны новага тыпу. МакМастэр адзначыў, што Кітай і Расея "падрываюць міжнародны парадак і стабільнасць". Яны ігнаруюць суверэнныя правы сваіх суседзяў і вяршэнства закона. МакМастэр падкрэсліў, што Расея развязала "вайну новага пакалення", якая выкарыстоўвае метады дыверсій, дэзінфармацыі і прапаганды.