Жыхары Віцебска хочуць правесці 25 сакавіка мітынг-канцэрт
1- 11.03.2018, 20:17
- 8,781
З адпаведнай заявай актывісты звярнуліся да ўладаў.
Жыхары Віцебска звярнуліся па дазвол да ўладаў на мітынг 25 сакавіка. Гараджане плануюць адзначыць 100-годдзе Беларускай Народнай Рэспублікі ў Віцебску на святочным мітынгу-канцэрце, паведамляе віцебская «Весна».
Заяву з просьбай аб дазволе на правядзенне святочнага мерапрыемства падалі ў адміністрацыю Чыгуначнага раёну Віцебску прадстаўнікі Віцебскай абласной арганізацыі Партыі Беларускі Народны Фронт.
Калі ўлады прымуць станоўчую пастанову, то мітынг, прымеркаваны да 100-х угодак БНР адбудзецца 25 сакавіка ў віцебскім Парку культуры і адпачынку чыгуначнікаў. Заяўленая колькасць удзельнікаў - да 30 чалавек.
Нагадаем, што віцебскія ўлады атрымалі таксама заяўку на правядзенне ў горадзе ў Дзень Волі святочнага шэсця. З просьбай аб правядзенні шэсця па вуліцы Суворава (ад помніка Альгерду да помніка Караткевічу) звярнуўся прадстаўнік Беларускага Нацыянальнага Кангрэсу Уладзімір Кійко.