У Віцебскай вобласці павялічаць стаўкі адзінага падатку

З ІП і фізічных асоб хочуць дадаткова атрымаць $300 тысяч.

За кошт павышэння стаўкі адзінага падатку з індывідуальных прадпрымальнікаў і фізічных асоб у бюджэт Віцебскай вобласці у 2018 годзе плануюць дадаткова прыцягнуць 600 000 рублёў, пішуць «Народныя навіны Віцебска».

Праект пастановы Віцебскага абласнога «савета дэпутатаў» «Аб адзiным падатку з iндывiдуальных прадпрымальнiкаў i iншых фiзiчных асоб», які прадугледжвае падвышэнне падаткаў, вынесены на грамадскае абмеркаванне, пра гэта паведамляецца на сайце аблвыканкама.

Самай вялікай застаецца стаўка адзінага падатку для гандляроў аўтатэхнікай па-за гандлёвымі месцамі - праектам прапануецца ўстанавіць яе ў абласным цэнтры (далей таксама пазначаны стаўкі для Віцебска) у суме 417 рублёў, такім чынам, рост гэтага падатку складзе амаль 7,5%.

Таксама застаецца высокім падатак для замежнікаў, якія гандлююць у Віцебску творамі жывапісу, графікі, скульптуры і вырабамі народных промыслаў і рамёстваў - цяпер ім давядзецца заплаціць 408 рублёў за разавую рэалізацыю не больш за 5 дзён на месяц, тут рост складзе 7,3%.

Стаўка адзінага падатку на гандаль адзеннем са скуры і складанай бытавой тэхнікай на гандлёвых аб'ектах будзе ўстаноўленая ў суме 266 рублёў, па-за гандлёвымі аб'ектамі - 318 рублёў, адпаведна стаўкі вырастуць на 7,3 і 7,4 адсотка.

Таксістам з аўтамабілямі ўмяшчальнасцю да 6 пасажыраў давядзецца плаціць 182 рублі (рост 7,7%), калі ж пасажырскіх месцаў больш за 7, то падатак будзе 218 рублёў (рост 7,4%). Пры кругласутачнай дзейнасці таксоўкі стаўка падатку, адпаведна, складзе 222 рублі (7,2%) і 248 рублёў (7,4%).

Павялічыцца стаўка адзінага падатку і на тую дзейнасць, якую можна ажыццяўляць без рэгістрацыі індывідуальным прадпрымальнікам. Напрыклад, за распрацоўку вэб-сайтаў цяпер трэба будзе заплаціць 97 рублёў на месяц замест 90, а за фотаздымку 126 рублёў замест 117.

Павелічэнне сумы стаўкі адзінага падатку ўлада аргументуе тым, што ў індывідуальных прадпрымальнікаў за 2017 год прыбытак ад рэалізацыі тавараў, работ, паслуг павялічылася больш чым на 25% у параўнанні з папярэднім годам.

Напрыклад, у ІП, якія гандлююць нехарчовымі таварамі, рост прыбытку склаў 129,4%, якія надаюць паслугі ў рамонце прадметаў асабістага карыстання, бытавых вырабаў і іншае - 128%, таксістаў - 132,5%. Прадпрымальнікі, якія займаюцца гэтымі тыпамі дзейнасці, складаюць 41% ад прадпрымальнікаў - аплатнікаў адзінага падатку.

Улічваючы эканамічныя фактары, інспекцыя Міністэрства падаткаў і збораў Беларусі Віцебскай вобласці прапанавала павялічыць дзейныя стаўкі адзінага падатку на ўзровень індэксацыі падатковых ставак у мэтах іх адаптацыі да інфляцыйных працэсаў, гэта значыць на 7,4%.

Грамадскае абмеркаванне праекта пастановы «Аб адзіным падатку з індывідуальных прадпрымальнікаў і іншых фізічных асоб» будзе праходзіць да 26 сакавіка. Папярэдні раз стаўкі адзінага падатку з індывідуальных прадпрымальнікаў і фізічных асоб у Віцебскай вобласці падымаліся ў пачатку 2017 года.