Аляксей Яўгенаў: Пакуль чыноўнікі і «дэпутаты» адпачываюць у цёплых кватэрах, людзі замярзаюць

Прафзвяз РЭП дапамагае жыхарам Чавусаў не змерзнуць ва ўласных кватэрах праз бяздзейнасць чыноўнікаў.

Аляксей Яўгенаў, прававы інспектар і прадстаўнік прафзвязу РЭП Магілёўскай вобласці, распавёў praca-by.info аб сітуацыі, якая склалася:

- У Магілёўскі офіс прафзвязу РЭП звярнуліся жыхары Чавусаў, у тым ліку і сябры прафзвязу, з просьбай скласці скаргу на бяздзейнасць чыноўнікаў. Людзі замярзаюць. А пакуль мясцовыя чыноўнікі і «дэпутаты» адпачываюць у цёплых кватэрах, мы чарговым разам нададзім гэтую мінімальную дапамогу насельніцтву.

Прававы інспектар склаў скаргу на бяздзейнасць службовых асоб Чавускага райвыканкама і Чавускага ЖКГ у рамонце цеплавога абсталявання і забеспячэнні гарачай вадой:

«Мы, жыхары горада Чавусаў, якія пражываюць у доме №90 на вуліцы 60 гадоў СССР, неаднаразова звярталіся да Чавускіх уладаў і жылкамунгасу з просьбай адрамантаваць няспраўнае цеплавое абсталяванне і сістэмы забеспячэння гарачай вадой у нашым доме. Увесь ацяпляльны перыяд у кватэрах холадна і мокра, батарэі ледзь цёплыя. Гарачая вада адсутнічае, таму яе расход складае 5 куб. метраў на месяц на кватэру.

Аднак, уладамі, «дэпутатамі» мясцовых саветаў і Чавускага ЖКГ дагэтуль не ўжытыя захады для правядзення работ для нармальнага ацяплення і забеспячэнні гарачай вадой нашага дома згодна з нормамi. Аднак, рахункі на аплату за ўсе гэтыя не нададзеныя паслугі мы аплачваем».

У калектыўнай скарзе падпісанты запатрабавалі правесці праверку і абавязаць адказных службовых асоб адрамантаваць сістэму ацяплення і прыцягнуць вінаватых да адказнасці, а таксама зрабіць пераразлік за той перыяд, калі батарэі былі халоднымі, а аплату патрабавалі як за гарачыя.