Віцебскія праваабаронцы павіншавалі палітвязняў з Днём Волі

Праваабаронцы адправілі паштоўкі Змітру Паліенку і Міхаілу Жамчужнаму.

Напярэдадні святкавання 100-годдзя абвяшчэння незалежнасці Беларускай Народнай Рэспублікі праваабаронцы Віцебска адправілі віншавальныя паштоўкі палітвязням Змітру Паліенку (папраўчая калонія №2, г. Бабруйск) і Міхаілу Жамчужнаму (папраўчая калонія №9, г. Горкі), паведамляе віцебская «Вясна». Акрамя таго, яны павіншавалі са святам беларускага краязнаўцу Алеся Юркойця (папраўчая калонія №3, пас. Віцьба).

Жыхар Менска Зміцер Паліенка быў асуджаны паводле артыкула 364 Крымінальнага кодэкса (насілле або пагроза гвалту ў дачыненні да супрацоўніка органа ўнутраных спраў) і часткі 2 артыкула 343 (выраб і распаўсюд парнаграфічных матэрыялаў або прадметаў парнаграфічнага характару) пасля акцыі веласіпедыстаў у Менску, разагнанай міліцыяй.

12 кастрычніка 2016 года быў абвешчаны прысуд у дачыненні да Паліенкі - два гады пазбаўлення волі з адтэрміноўкай на два гады. 7 красавіка 2017 года пастанова аб адтэрміноўцы была скасаваная праз «невыкананне абавязку працаўладкавання», «парушэнне рэжыму адтэрміноўкі» і два спагнанні паводле адміністрацыйных спраў.

Жыхар Віцебска Міхаіл Жамчужны, заснавальнік праваабарончай установы «Платформа Інавэйшн», якая займалася праблемамі пенітэнцыярнай сістэмы краіны.

10 ліпеня 2015 года ён быў прызнаны вінаватым паводле часткі 1 артыкула 375, частак 1 і 2 артыкула 376 Крымінальнага кодэкса («незаконны выраб», набыццё або збыт сродкаў для сакрэтнага атрымання інфармацыі) і частак 1 і 2 артыкула 431 («дача хабару») і асудзілі на шэсць гадоў пазбаўлення волі ва ўмовах строгага рэжыму. 23 кастрычніка 2015 года прыгавор, вынесены Віцебскім абласным судом, быў перагледжаны калегіяй Вярхоўнага суда, якi прызначыў Жамчужнаму больш суровую кару - шэсць з паловай гадоў пазбаўлення волі.

Алесь Юркойць праходзіў паводле гучнай справы ашмянскіх мытнікаў. 5 верасня 2017 года ён быў асуджаны на 7 гадоў пазбаўлення волі паводле часткі 3 артыкула 430 Крымінальнага кодэкса (атрыманне хабару ў асабліва значнай суме ў складзе арганізаванай групы).