Кім можа стаць Даля Грыбаўскайтэ пасля завяршэння тэрміну паўнамоцтваў

Прэзідэнт Літвы, якой у наступным годзе споўніцца 63 гады, сядзець склаўшы рукі не мае намеру.

Дзе будаваць дом, прэзідэнт Літвы Даля Грыбаўскайтэ ўжо вызначылася. Але пра сваю далейшую кар'еру яна пакуль не распаўсюджваецца. Экс-прэм'ер Андрус Кубілюс упэўнены, што ёй падыдзе шэраг пасад у структурах Еўразвязу. Яна можа стаць кіраўніцай Еўракамісіі, і Рады Еўропы, піша delfi.lt са спасылкай на lrt.lt.

Відавочна, што Грыбаўскайтэ, якой налета споўніцца 63 гады, сядзець склаўшы рукі не мае намеру.

«Яна можа прэтэндаваць на многія пасады. І на пасаду прэзідэнта ЕЗ, і на пасаду кіраўніцы ЕК, бо на гэтыя пасады часта выбіраюць кіраўнікоў невялікіх краін. А паводле ўсіх звесткак, іх могуць прапаноўваць і сябрам новых краін ЕЗ. Акрамя таго, ці было такое ў гісторыі ЕЗ, каб высокая пасада дасталася жанчыне. А можа я памыляюся?» - разважаў Кубілюс.

Ён сказаў, што важна і тое, што Грыбаўскайтэ ўжо працавала ў ЕК, яе там ведаюць.

«Няма сэнсу каментаваць плёткі. Мэта прэзідэнта - канцэнтрацыя на цяперашняй працы, на рашэннях, у якіх мае патрэба краіна. Усё астатняе будзе каментавацца пасля завяршэння тэрміну паўнамоцтваў», - сказалі LRT.lt прадстаўнікі прэзідэнта Літвы.

Кубілюс перакананы, што ў Літвы ёсць магчымасць змагацца за высокую пасаду ў ЕЗ на наступных выбарах у Еўрапарламент.

«Я думаю, што агульнымі намаганнямі Літвы можна дамагчыся, каб Грыбаўскайтэ заняла якую-небудзь з пасадаў у ЕЗ. І гэта будзе выгадна не толькі для нас, але і для Еўропы», - сказаў Кубілюс.

Экс-прэм'ер Гедымінас Кіркілас заўважыў, што звычайна былыя прэзідэнты краін ЕЗ ці прэм'ер-міністры прызначаліся на пасаду генеральнага сакратара NATO. «Цяпер гэту пасаду займае Енс Столтэнбэрг (былы прэм'ер Нарвегіі - LRT.lt), тэрмін яго паўнамоцтваў працягнулі яшчэ на 4 гады, таму Грыбаўскайтэ не можа прэтэндаваць на яго, а на больш нізкіх пасадах працуюць вайскоўцы і экспэрт», - сказаў Кіркілас, зняпраўджваючы размовы пра тое, што Грыбаўскайтэ можа заняць пасаду генеральнага сакратара NATO.

На думку Кіркіласа, калі Грыбаўскайтэ наважыць шукаць месца ў структурах ЕЗ, то рэальная пасада - гэта пасада прэзідэнта ЕЗ, які з 2014 г. займае экс-прэм'ер Польшчы Дональд Туск.

«Але не трэба забываць, што ўжо даўно кажуць пра зніжэнне бюракратыі ў ЕЗ і плануюць аб'яднаць пасады прэзідэнта ЕЗ і кіраўніка ЕК», - нагадаў Кіркілас.

Экс-кіраўнік МЗС Літвы і прадстаўнік ЕЗ у Афганістане і Расеі Вігаўдас Ушацкас мяркуюць, што ЕЗ можа ацаніць досвед працы Грыбаўскайтэ на пасадзе кіраўніка Мінфіна Літвы і еўракамісара. Прэзідэнт Францыі Эмануэль Макрон летась прапанаваў увесці ў ЕЗ пасаду міністра фінансаў ЕЗ. «Думаю, з улікам досведу Грыбаўскайтэ, яна магла б стаць сур'ёзным кандыдатам на гэту пасаду, таму Літве варта займацца лабізмам у гэтай сферы», - заўважыў Ушацкас.

Еўракамісар Віцяніс-Павілас Андрукайціс сказаў, што першае пасяджэнне новага ЕП павінна адбыцца ў ліпені 2019 года. У жніўні ЕП адпачывае. У верасні пачнуцца пошукі новага кіраўніка ЕК. Кандыдатаў можа прапаноўваць любая партыя ЕП.

«Грыбаўскайтэ магла б дамагацца гэтай пасады, калі б урад Літвы дэлегаваў яе на пасаду еўракамісара, а кандыдатам ад партый ЕП яна не можа стаць, бо для гэтага ёй трэба ўдзельнічаць у выбарах у ЕП. А яна ў іх сапраўды не будзе ўдзельнічаць (час прэзідэнцкіх выбараў у Літве і выбараў у ЕП супадае), - сказаў Андрукайціс.

Ён асцярожна ацаніў магчымасць Грыбаўскайтэ прэтэндаваць на пасаду кіраўніка фінансаў ЕЗ і сказаў, што імаверна ў першую чаргу на гэтую пасаду будуць прэтэндаваць кандыдаты Нямеччыны і Францыі.

«У іх, калі з'явіцца такая пасада, будуць пазачарговыя магчымасці», - сказаў Андрукайціс.