«Антонаў» хоча выйсці на расейскі рынак праз Беларусь

Украінская кампанія «Антонаў» пакуль не можа наладзіць серыйны выпуск самалётаў без расейскіх камплектуючых.

Пра гэта паведамляе Liga.net.

ДП «Антонаў» і Менскі завод грамадзянскай авіяцыі №407 (МЗГА) вядуць закрытыя перамовы пра стварэнне сэрвіснага цэнтра ў Менску.

У Беларусі плануецца падаўжаць лётную прыдатнасць, рэсурс самалётаў АН, праводзіць сэрвіснае абслугоўванне, рамонт і зборку самалётаў сямейства Ан-148/158.

Згодна з пратаколам перамоваў паміж прадпрыемствамі (копія якога ёсць у распараджэнні выдання), у рамках супрацоўніцтва разглядаецца магчымасць выкарыстання расейскіх камплектуючых, у тым ліку і санкцыйных.

Адзначаецца, што імпартазамяшчэнне расейскіх камплектуючых, якое кампанія праводзіць з 2015 года, не дапамагае запусціць серыйную вытворчасць.

Са слоў віцэ-прэзідэнта ДП «Антонаў» Андрэя Чабанова, прадпрыемства ўважае мэтазгодным развіццё сумесных дзяржаўных праграм у арганізацыі вытворчасці і кааперацыйнага серыйнага выпуску грамадзянскіх самалётаў Ан-148/Ан-158 сумесна з Менскім заводам грамадзянскай авіяцыі №407 у якасці пераходнага этапа для выхаду з крытычнай сітуацыі, у якой апынуўся «Антонаў».

У ДП «Антонаў» пацвердзілі факт перамоў, але адмовіліся каментаваць падрабязнасці праекта, бо канчатковая пастанова адносна яго рэалізацыі яшчэ не прынятая.