Берасцейка пра ваганні курсу валют: Не шмат купіш валюты на наш заробак

На мінулым тыдні курсы даляра і еўра ў Беларусі раптам выраслі.

«БГ» запыталася гараджан, што яны робяць у моманты валютных ваганняў, ці адкладаюць грошы і які прагноз даюць адносна курсаў замежнай валюты.

Галіна Андрэеўна, пенсіянерка:

- Я нічога не раблю абсалютна, калі такія ваганні валют адбываюцца. Скідаю валюту хіба што. Я ўжо даўно зрабіла ашчаджанні, цяпер я на пенсіі, таму цяпер толькі залажу ў гэтыя ашчаджанні. Пенсію атрымліваю і ў слоік лезу. Курс даляру будзе залежаць ад міжнароднай абстаноўкі. Гэта ад нас не залежыць, толькі ад Захаду залежыць.

Наталля, цырульніца:

- Цяпер ніякіх дзеянняў не задумваю. Няма на што купляць: беларускія хутка разыходзяцца. За курсам валют сачу - на адпачынак жа хочацца. Калі будзе ўсё нармальна, то будзе адпачынак, калі не, то не. Ашчаджанні захоўваю ў далярах. Думаю, што даляр ніжэй не стане, паволі будзе расці. А потым паглядзім.

Георгій, працуе ў сферы будаўніцтва:

- У момант валютных ваганняў я працую, гэта мне дазваляе зарабіць грошы. А ўжо абменьваць ці не абменьваць - кожны глядзіць па сітуацыі, у якой ён знаходзіцца. Няма на чым ашчаджанні рабіць. Цяпер не ведаю, колькі даляр каштуе, у раёне 2 рублёў, пра ваганні не ведаю. За кошт чаго даляр павінен абрынуцца? Дакладна не ўпадзе.

Эла, медсястра:

- У мяне, на жаль, невялікі заробак, і плацяць мне ў беларускіх рублях, таму сёння купіш даляры, заўтра іх прадасі. Няма вялікага сэнсу, бо вялікая розніца атрымліваецца толькі на вялікіх сумах. Калі купіць 100 даляраў, то пару цэнтаў выйграеш, або прайграеш. Гэта ў глабальных маштабах кагосьці хвалюе, у каго валютныя аперацыі або фірмы. Нас гэта мала датычыць. Я не магу сказаць, што асабліва сачу за курсам валют. Цяпер жа карткі міжнародныя, таму ўсюды можна па картцы расплачвацца. Не моцна шмат купіш валюты на наш заробак.

Андрэй, працуе ў сельскай гаспадарцы:

- Я нічога не раблю ў моманты валютных ваганняў. Гэтак жа, як і ўсе, купляю даляры і еўра па магчымасці з кожнага заробку. Аддаю перавагу рабіць ашчаджанні ў далярах. За курсам не сачу, колькі каштуе, за столькі і купляю, якая розніца. Не вернецца даляр да адзнакі 2 рублі, толькі ў рост будзе ісці.

Антон, праграміст:

- У моманты валютных ваганняў не раблю нічога, звычайна пазней трошкі. З заробку адкладаю замежную валюту. Аддаю перавагу рабіць ашчаджанні ў еўра - Еўропа бліжэй. За курсам даляра і еўра спецыяльна не сачу, але ўвогуле за імі не сачыць немагчыма, яны ўсюды нас атачаюць. Калі і вернецца даляр да адзнакі ніжэй 2 рублёў, то ненадоўга.

Валерыя, медсястра:

- Я працую, калі валютныя ваганні адбываюцца. Ашчаджанні я раблю. На адпачынак адкладаю. Кошты ў еўра або ў далярах кажуць, але калі прыходзіш за турам, то плаціць усё роўна ў беларускіх. Купляеш еўра, потым абменьваеш іх на беларускія рублі і асабліва нічога не выйграеш. Таму адкладаю ў беларускіх. Думаю, што валюта будзе расці, таму што цяпер усе цэны растуць. І даляр, і еўра таксама. Мне здаецца, што ён будзе яшчэ даражэйшым.