Дарадца Трампа: Адмова КНДР ад ядзерных выпрабаванняў - гэта пастка

Не варта верыць дыктатару Кім Чэн Ыну, які абвясціў пра мараторый на ядзерныя выпрабаванні.

Як паведамляе газета Washington Post, у асяроддзі прэзідэнта ЗША без натхнення ўспрынялі заяву лідара КНДР аб тым, што яго краіна спыняе выпрабаванні ядзернай зброі. На іх думку, Кім Чэн Ын стварае бачнасць таго, што ён разумны палітык і гатовы на кампрамісы.

Такім чынам, мяркуюць у Белым доме, кіраўнік Паўночнай Карэі фактычна «заваблівае ЗША ў пастку». КНДР, на думку дарадцаў Трампа, разлічвае, што ў абмен на гэтую саступку даб'ецца ад Вашынгтона выканання сваіх патрабаванняў падчас запланаванай на травень-чэрвень сустрэчы лідараў дзвюх краін.

Яны адзначылі, што КНДР будзе разлічваць на паслабленне эканамічных санкцый, уведзеных ЗША, у тым ліку і пры адміністрацыі Трампа. Аднак пры гэтым дарадцы амерыканскага прэзідэнта нагадалі, што ў папярэднія гады кіраўніцтва Паўночнай Карэі не раз парушала дасягнутыя дамоўленасці.

Сам Трамп у сваім Twitter станоўча адрэагаваў на навіну з КНДР. «Паўночная Карэя пагадзілася прыпыніць усе ядзерныя выпрабаванні і зачыніць буйны выпрабавальны палігон. Гэта вельмі добрая навіна для Паўночнай Карэі і свету - вялікі прагрэс! Чакаем нашага саміту», - напісаў амерыканскі прэзідэнт.