Уздоўж праспекта Дзяржынскага хочуць пабудаваць яшчэ чатыры мікрараёны

Для гэтага давядзецца знесці ўвесь прыватны сектар, дзе пражывае 2,2 тысячы чалавек.

Менск усё ж «гумовы», і спрачацца з гэтым бескарысна. Архітэктары выношваюць планы ўзвядзення чатырох новых мікрараёнаў паміж станцыямі метро «Міхалова» і «Грушаўка». На гэтай тэрыторыі хочуць пабудаваць шматпавярховікі - больш за 600 тысяч кв. м новага жылля, - а таксама аб'екты сацыяльнай інфраструктуры. Але напачатку давядзецца знесці ўвесь прыватны сектар, дзе сёння пражывае 2,2 тысячы чалавек. Праект вынесены на грамадскае абмеркаванне, якое будзе праводзіцца з 2 да 28 траўня 2018 года, паведамілі a target="_blank" href=https://realt.onliner.by/2018/04/22/proekt-42>Onliner.by ў адміністрацыі Маскоўскага раёна Менска.

Знос прыватнага сектара ўздоўж пр. Дзяржынскага быў задуманы даўно, і для мясцовых жыхароў перспектыва рассялення - зусім не навіна. Аднак планы архітэктараў пайшлі далей. Тэрыторыя, для якой распрацаваны цяперашні праект рэканструкцыі, закранае адразу некалькі буйных жылых масіваў: паміж пр. Дзяржынскага і вул. Чыгуначнай, паміж пр. Дзяржынскага і 2-м Прылуцкім завулку, а таксама частку «Розачкі» ў межах пр. Дзяржынскага - пр. Жукава - вул. Р. Люксембург. Уся гэтая тэрыторыя займае плошчу 190 га і ўмоўна падзеленая на чатыры мікрараёны. У кожным з іх прадугледжваюцца знос і новае будаўніцтва.

Сёння плошча прыватнага сектара ў гэтым раёне складае 45,4 тысячы кв. м, тут пражывае 2,2 тысячы чалавек. Увесь прыватны сектар хочуць знесці, а яго жыхароў рассяліць. На месцы сядзібнай забудовы ўзведзеныя жылыя комплексы вышынёй ад 9 да 23 паверхаў. Агулам архітэктары «Мінскграда» прапаноўваюць пабудаваць 614 тысяч кв. м жылля. Гэта прыблізна 9,5 тысячы кватэр. Насельніцтва раёна павінна павялічыцца з цяперашніх 19,3 тысячы да 37,8 тысячы чалавек.

Акрамя жылля павінны з'явіцца аб'екты сацыяльнай інфраструктуры. Так, на тэрыторыі сядзібнай забудовы паміж 1-й Уманскай вуліцай і вул. Кулібіна прапануюць пабудаваць два дзіцячыя садкі і паліклініку. Яшчэ адзін дзіцячы садок хочуць размясціць на месцы вытворчай забудовы непадалёк ад вул. Дубравінскай. Месца для яшчэ дзвюх дашкольных устаноў знайшлі ў раёне станцыі метро «Грушаўка».

Насыцяць раён і новымі адміністрацыйна-грамадскімі комплексамі.

Праект плануюць рэалізаваць у два этапы. Першы - да 2022 года, другі - 2023-2030 гады. На першым этапе стаіць задача знесці 32,7 тысячы кв. м сядзібнай забудовы і 2 тысячы кв. м малапавярховай шматкватэрнай забудовы. На вызваленых тэрыторыях можна пабудаваць 442,2 тысячы кв. м.

Азнаёміцца з праектам, а таксама выказаць сваё меркаванне ў часопісе рэгістрацыі пісьмовых заўваг і прапаноў можна ў адміністрацыі Маскоўскага раёна (пр. Дзяржынскага, 10, хол 1-га паверха) з 2018.05.02 да 2018.05.28. У будныя дні з матэрыяламі можна азнаёміцца з 8:00 да 20:00, у суботу - з 9:00 да 13:00. Таксама падрабязныя матэрыялы прадстаўленыя на сайце раённай адміністрацыі.

Прэзентацыя праекта адбудзецца 3 траўня а 18:30 у актавай зале адміністрацыі Маскоўскага раёна. Запрашаюцца ўсе ахвотныя.