Фотафакт: Беларуска зрабіла сукенку-трансформер

Беларуская дызайнерка абяцае замяніць ім паўгардэроба.

Вольга Агей абяцае пазбавіць жанчын ад штодзённых пакут выбару «што надзець». Кажа, што яе сукенку-трансформер можа замяніць і дзелавы касцюм, і вячэрні ўбор, і ўбранне для шпацыру. Што за сукенка, колькі яна будзе каштаваць, Вольга паказала і расказала Onliner.by.

Вольга марыла займацца дызайнам з дзяцінства. Але на патрабаванне бацькоў давялося ісці вучыцца на эканаміста. Дзяўчына шчасна скончыла Беларускі дзяржаўны аграрна-тэхнічны ўніверсітэт, атрымала дыплом і адкрыла свой бізнэс у сферы продажаў.

Але некалькі гадоў таму дзяўчына наважыла ўсё-такі ўвасобіць сваю мару ў жыццё: яна стала прыдумляць адзенне і шыць яго. Са сваёй дзіцячай калекцыяй яна нават удзельнічала ў Беларускім тыдні моды. А цяпер Вольга наважыла паэксперыментаваць з адзеннем для дарослых. Кажа, што больш за ўсё ёй падабаецца адзенне, якое з лёгкасцю можна трансфармаваць.

- Сукенак-трансформераў у мяне некалькі. Гэты камплект больш за ўсё падыходзіць для дзелавых дзяўчат, у якіх за дзень бываюць розныя сустрэчы, - дызайнер распакоўвае сваю сукенку. Яна складаецца з пяці частак - два розныя верхі (з кароткімі і доўгімі рукавамі) і два нізы (доўгая і кароткая спадніцы), пяты элемент - гэта шлеі, якія можна выкарыстоўваць для стварэння сарафана.

- Верх і ніз можна мяняць, прышпільваючы адно да другога пры дапамозе маланкі, а шлеі - пры дапамозе гузікаў, якія хаваюцца за поясам, - паказвае яна.

- Пакуль сукенка існуе ў двух колерах, чорным і чырвоным. Але ў будучыні мы плануем пашыраць лінейку. Што тычыцца памераў, то цяпер мы гатовыя шыць ад 42-га да 50-га, але шыем і па індывідуальных замовах, - кажа дзяўчына.

Тканіна, якую Вольга выкарыстала для доследнага ўзору, - гэта барбі, яна не камечыцца, шчыльная і прыемная навобмацак. У будучыні, кажа яна, магчыма выкарыстоўваць і іншую.

Першы вобраз - паўсядзённы. У ім можна пайсці і на працу, і на шпацыр у горад.

Адшпіліўшы верхнюю частку і надзеўшы блузку, атрымаем другі вобраз - больш дзелавой і строгі.

Прышпіліў шлеі - і гэта ўжо сарафан.

Мяняем верх з доўгімі рукавамі на верх з кароткімі - атрымліваем дыскатэчны варыянт.

Прышпільваем да верху з кароткімі рукавамі падоўжаны ніз - і атрымліваем - строгую вячэрнюю сукенку.

Дадаўшы да доўгай спадніцы шлеі і блузку, атрымліваем новы варыянт для офіса, дзе нельга хадзіць у міні.

- І так да бясконцасці, - упэўненая Вольга. - Можна мяняць абутак, аксэсуары - і насіць сукенку хоць круглы год.

Дызайнер кажа, што яе камплект зручны, па-першае, тым, што здымае лішні галаўны боль з нагоды «што надзець». Па-другое, дызайнер называе яго даволі экалагічным. Магчымасць камбінаваць пазбаўляе ад куплі мноства рэчаў, а значыць, эканоміць прыродныя рэсурсы.

Цяпер Вольга запусціла краўдфандынгавую кампанію па зборы сродкаў на пашыў сукенак-трансформераў. Кошт камплекту з пяці рэчаў складзе 195 рублёў.