Кошты бензіну паднімуць напалову?
17- 4.04.2018, 23:01
- 44,188
Разам з падвышэннем коштаў паліва падвысяцца кошты прадуктаў і тавараў.
Толькі 5 дзён пратрымаліся ранейшыя кошты паліва. Сёння адбылося чарговае падаражанне. На 1 капейку, але гэта ўжо шостае падвышэнне коштаў з пачатку года, што не засталося незаўважаным аўтааматарамі, паведамляе «Белсат».
Паліўны бізнэс-па-беларуску выглядае ненармальна
Бензін на айчынных запраўках прадаецца танней за яго сабекошт. Як гэта магчыма? Нафтаперапрацоўчыя заводы кампенсавалі страты за кошт продажу паліва за мяжу, але апошнія месяцы і гэта перастала кампенсаваць страты. Для НПЗ застаўся адзіны шлях.
«Падвышаць кошты пакуль яны не выраўняюцца з расейскімі, пакуль гэта не стане прыбытковым для Белнафтахіму», - тлумачыць Аляксей Хвашчынскі, галоўны рэдактар газеты ABW.BY.
Кошты растуць у Расеі, вырастуць і ў нас
У Расеі на змену перадвыбарнай «стабільнасці», на думку экспэртаў, прыйдзе значнае падаражанне паліва.
Чакаецца, што ў так званы перыяд сезоннага росту попыту на паліва, цэннікі на запраўках у Расеі пачнуць прыкметна змяняцца, а значыць, і ў нас таксама.
«Калі мы хочам даведацца, якія кошты будуць у Беларусі летам ці бліжэй да восені, будзем глядзець на кошты ў Смаленскай, Бранскай і Пскоўскай абласцях. І гэта значыць, што калі ў Расеі кошты падрастуць, то ў нас яны праз тыдзень-два, праз месяц вырастуць», - упэўнены Хвашчынскі.
Капейка да капейкі – рубель выходзіць!
У Расеі чакаецца падвышэнне адразу на 5 расейскіх рублёў за літр - гэта 17 беларускіх капеек.
Да канца года такімі тэмпамі кошты паліва паднімуцца на чвэрць, калі не напалову. А гэта значыць, што падвысяцца кошты прадуктаў і тавараў.