Берасцейцы актыўна змагаюцца з акумулятарным заводам

Супраціўнікі акумулятарнага завода падалі касацыйныя скаргі ў Берасцейскі абласны суд.

У судовую калегію грамадзянскіх спраў Берасцейскага абласнога суду 6 красавіка пададзеныя касацыйныя скаргі грамадскага аб'яднання «Экадом» і актывіста Дзмітрыя Бекалюка, піша «Брестская газета».

Яны абскардзяць у судзе вышэйшай інстанцыі пастанову суда Маскоўскага раёна горада Берасця ад 27 сакавіка паводле пазову да ТАА «АйПауэр» і Берасцескага райвыканкаму аб поўным прыпыненні гаспадарчай дзейнасці акумулятарнага завода «АйПауэр» у СЭЗ Берасце. Нагадаем, у задавальненні заяўленых позваў патрабаванняў судом першай інстанцыі было адмоўлена.

У сваёй скарзе пазоўнік Дзмітрый Бекалюк заяўляе, што з вышэйзгаданай пастановай ён не згодны. На ягоную думку, факты, укладзеныя судом у аснову пастановы, не пацверджаныя дастатковымі і пэўнымі довадамі, а выкладзеныя ў выснове суда не адпавядаюць устаноўленым фактам.

Ён звяртае ўвагу на той факт, што падчас судовага працэсу высветлілася, што маецца некалькі справаздач аб ацэнцы ўздзеяння на навакольнае асяроддзе (АУНА) акумулятарнага завода «АйПауэр».

«З названага незразумела, якая са справаздач адлюстроўвае сапраўдную ацэнку ўздзеяння на навакольнае асяроддзе планаванай гаспадарчай дзейнасці акумулятарнага завода, чаму адказчыкам у розныя органы прадстаўляюца розныя справаздачы аб ацэнцы ўздзеяння на навакольнае асяроддзе, і якая са справаздач падлягае грамадскаму абмеркаванню, а якая не. Судом першай інстанцыі гэтая акалічнасць пакінутая без якой-небудзь ацэнкі», - гаворыцца ў скарзе.

Акрамя таго, ён паказвае, што падчас судовага працэсу неаднаразова заяўляў хадайніцтвы аб выпатрабаванні довадаў паводле справы і аб выкліку ў якасці сведак асоб, якія маглі растлумачыць фактычныя абставіны патэнцыйнай небяспекі названага завода.

«Аднак названыя хадайніцтвы не былі задаволеныя судом, што фактычна пазбавіла пазоўнікаў магчымасці даць якія-небудзь довады», - заяўляе актывіст.

Берасцеец Дзмітрый Бекалюк з'яўляецца ўдзельнікам ініцыятыўнай групы супраць будаўніцтва акумулятарнага завода пад Берасцем, якая дамагаецца як мінімум прыпынення гэтай будоўлі. Са слоў актывістаў, гэтая вытворчасць з'яўляецца патэнцыйна небяспечнай для экалогіі і здароўя жыхароў і не павінна весціся побач з абласным цэнтрам. Пасля іх звароту ў адміністрацыю Лукашэнкі створаная камісія, чальцом якой трэба будзе адказаць на ўсе пытанні, звязаныя з будаўніцтвам у СЭЗ акумулятарнага завода.

У канцы студзеня ГА «Экадом» і некалькі прадстаўнікоў ініцыятыўнай групы звярнуліся ў суд Маскоўскага раёна г. Берасця з позвай аб поўным прыпыненні гаспадарчай дзейнасці ТАА «АйПаўэр». У пазове яны заяўлялі, што, на іхнію думку, будаўніцтва завода вядзецца з парушэннямі і яго прыпыненне патрэбнае для аднаўлення законнасці. У канцы сакавіка была абвешчаная пастанова суда паводле гэтай справы - у задавальненні пазову было адмоўлена.

Пачынаючы з сакавіка супраціўнікі завода кожную нядзелю выходзілі на плошчу Леніна ў Берасці пакарміць галубоў і тым самым звярнуць увагу ўладаў і грамадскасці да сітуацыі вакол завода. Некаторых з іх за гэта прыцягнулі да адміністрацыйнай адказнасці, іншых выклікалі ў міліцыю для дачы тлумачэнняў і прафілактычнай гутаркі аб недапушчальнасці парушэння заканадаўства аб масавых мерапрыемствах. Паралельна актывісты спрабуюць дабіцца ад мясцовых уладаў дазволу на правядзенне мітынгу супраць будаўніцтва завода, але пакуль ім гэта не ўдалося. Цяпер яны чакаюць адказу з гарвыканкаму на чарговую заяўку.

А 6 красавіка ў Берасці аднавіўся актыўны збор подпісаў супраць будаўніцтва завода. Новыя подпісы і сабраныя раней плануецца перадаць разам з чарговым зваротам у адміністрацыю Лукашэнкі.