Подпісы за адстаўку чыноўнікаў Берасця адпраўленыя ў адміністрацыю Лукашэнкі

Нягледзячы на ціск, актывісты змаглі сабраць больш за дзве з паловай тысячы подпісаў.

У адміністрацыю кіраўніка Беларусі 11 траўня адпраўленая заяву і прыкладзеныя да яе 2 665 подпісаў за адстаўку кіраўнікоў Берасця, Берасцейскага раёна і вобласці ў сувязі са стратай даверу. Пра гэта паведаміў «БГ» праваабаронца Раман Кісляк.

На думку аўтараў звароту, мясцовыя чыноўнікі «нядобрасумленна выконваюць свае службовыя абавязкі, ігнаруюць інтарэсы жыхароў Берасцейскага рэгіёна і свядома заплюшчваюць вочы на шкоду, што чыніцца навакольнаму асяроддзю і здароўю людзей». Гаворка ідзе аб будаўніцтве акумулятарнага завода «АйПауэр» пад Берасцем, тысячах тон волавазмяшчальных адкідаў, некалькі гадоў ляжаць побач з пасёлішчам Зялёны Бор, і дзейнасці завода «БІТ-Сплаў» у Белаазёрску.

«Пасля абвяшчэння аб пачатку збору подпісаў стала паступаць інфармацыя, што кіраўніцтву некаторых прадпрыемстваў і арганізацый горада пагражаюць звальненнем работнікам і іх сваякам, калі іх подпіс будзе выяўлена пад дадзеным зваротам. Рэпрэсіі зазналі таксама тыя, хто збіраў подпісы адкрыта ў публічных месцах. Нягледзячы на гэткі ціск, актывісты змаглі сабраць больш за дзве з паловай тысяч подпісаў», - распавёў праваабаронца.

Паводле ягоных слоў, гэта першая партыя подпісаў за вызваленне ад пасад. Збор будзе працягнуты.

«Пасля звальнення за ўдзел у мітынгу лекаркі Таццяны Фесікавай усё больш і больш людзей далучаюцца: раздрукоўваюць зварот, падпісныя лісты і пачынаюць збіраць подпісы. Іх злуе тое, што замест развязання праблем, звязаных з волавымі прадпрыемствамі Лемяшэўскага, улады заняліся запалохваннем берасцейцаў», - адзначыў Кісляк.

Дарэчы, подпісы былі адпраўленыя ў той дзень, калі суддзі Ленінскага раёна Берэсця наклалі адміністрацыйныя спагнанні ў выглядзе вялікіх штрафаў на актывістаў, якія збіралі подпісы 6 траўня. Аляксандр Кабанаў і Сяргей Пятрухін аштрафаваныя на 50 базавых адзінак кожны, Дзмітрый Андрасюк - на 20 базавых адзінак. Усіх трох прызналі вінаватымі паводле арт 23.34 КоАП РБ «Парушэнне парадку арганізацыі або правядзення масавых мерапрыемстваў».

Як ужо паведамляла «БГ», з пачатку года ў Берасці і раёне разгарнулася актыўная кампанія супраць будаўніцтва побач з абласным цэнтрам акумулятарнага завода «АйПауэр». Самыя актыўныя супраціўнікі завода ўвайшлі ў ініцыятыўную групу, якая заяўляе пра шматлікія парушэнні на розных этапах рэалізацыі праекта аб будаўніцтве завода АКБ.

Менш чым за два месяцы было сабрана амаль 37 тысяч подпісаў жыхароў Берасця і раёна, якія былі перададзеныя разам са зваротам у адміністрацыю Лукашэнкі. Аднак урадавая камісія, створаная пасля гэтага звароту, парушэнняў не знайшла.

Акрамя таго, шэраг жыхароў Берасця і Берасцейскага раёна, якія выступаюць супраць будаўніцтва акумулятарнага завода, ушчыльную заняліся праблемай жыхароў пасёлка Зялёны Бор. Побач з ім ужо каля трох гадоў пад адкрытым небам ляжаць больш за 7 700 тон свінцовай попелу, які належыць да III класа небяспекі. Са слоў пасялкоўцаў, іх здароўе за апошнія гады значна пагоршылася, але шкодныя адкіды дагэтуль не вывезеныя і не вядома, хто, калі і куды іх прыбярэ.

У канцы красавіка ў Берасці адбыўся дазволены ўладамі мітынг «Берасцейцы супраць волава». Удзел у ім ўзялі блізу двух тысяч чалавек. У канцы мітынгу была прынятая рэзалюцыя, у якой удзельнікі мітынгу патрабуюць неадкладна спыніць усе працы для будаўніцтва завода «АйПауэр», прыцягнуць да адказнасці службовых асоб, якія дапусцілі будаўніцтва гэтай вытворчасці і складаванне доўгі час тысяч тон волавага попелу ў Івацэвіцкім раёне. Яна таксама адпраўленая ў адміністрацыю Лукашэнкі.